Jambyl oblysynyń Baizaq aýdanyndaǵy jarylys saldarynan zardap shekken 28 naýqas Taraz qalasyndaǵy aýrýhanada em alyp jatyr. Ishinde tórteýiniń jaǵdaiy ortasha aýyr, dep habarlaidy QazAqparat.
Bul týraly oblys ákimi Berdibek Saparbaev BAQ ókilderine bergen suhbatynda aitqan.
«Qazirgi tańda Taraz qalalyq ortalyq aýrýhanada 28 naýqas emdelip jatyr. Onyń tórteýiniń jaǵdaiy ortasha aýyr. Olarǵa qajetti barlyq meditsinalyq kómek kórsetilýde. Ómirine eshqandai qaýip tónip turǵan joq. Dári-dármek pen dárigerler jetkilikti. Jalpy, meditsinalyq kómekke júgingen túrli deńgeide jaraqat alǵan 98 adamnyń ishinde qarapaiym turǵyndar joq. Barlyǵy - áskeriler men tótenshe jaǵdai salasynyń qyzmetkerleri», - dedi aimaq basshysy.
Sondai-aq, ol habarsyz ketken áskeriler men qutqarýshylardyń ata-analarymen, týǵan-týysqandarymen kezdesip, izdeý jumystary qalai júrip jatqanyn aitty.
«Izdeý jumystaryna áskeriler, TJD mamandary, kinologtar, tiisti mamandar, qyzmettik itter, atty adamdar jumyldyrylǵan. Arnaiy dron qurylǵysynyń múmkindigi de barynsha paidalanylýda. Qazirgi tańda 180 adam, 40 shaqty tehnika jumys isteýde», - dep jazady oblys ákiminiń baspasóz qyzmeti.
Berdibek Saparabevtyń aitýynsha, oqiǵa jaqyn jerdegi temirjoldar men avtojoldar qalypty rejimde jumys istei bastaǵan. Turǵyndardyń bári úilerine oralǵan. Tek baspanasy kúrdeli jóndeýden ótetin Qainar aýylynyń turǵyndary ǵana ýaqytsha baspanamen, azyq-túlikpen qamtamasyz etilgen.
Sondai-aq, oblys ákimi Jarylystan búlingen úilerdiń bári 2 aida qalpyna keltiriletinin aitty.
Jóndeýdi qajet etedi delingen 106 úidiń 35-ine kúrdeli jóndeý taǵaiyndalyp otyr. Oblystyq jedel shtab qalǵan 71 úidi jeńil zaqymdaldy dep tanyǵan.
«Olar da qalpyna keltiriledi. Barlyq jumystarǵa Úkimet tarapynan qaralatyn jáne jergilikti biýdjetten qosymsha bólinetin qarajat jumsalady. Óńirdegi demeýshiler de qarjylai kómek kórsetedi. Búgin bir úidiń kúrdeli jóndeý jumystary bastaldy.Qalǵan úilerde qurylysshylar erteńnen bastap iske kirisedi. Eki aidyń ishinde barlyq úilerdi qalpyna keltiremiz dep ózimizge mindetteme alyp otyrmyz. Oǵan bizdiń múmkindigimiz de, qurylysshylar kúshi de jetkilikti», - dedi oblys ákimi.
