Panfilov aýdanynyń damý qarqyny sońǵy jyldary ýaqytpen úndesip, kún ótken saiyn artyp keledi. Oǵan óńirdegi innovatsiialyq jańa jobalardyń júzege asýy, aýylsharýashylyǵynyń tyń tehnologiialarmen jabdyqtaýy, jańa kásiporyndardyń kóptep ashylýy qarqyn berýde. Soǵan sáikes turǵyndardyń áleýmettik jaǵdaiy da jaqsara tústi, jańa mektepter, meditsina mekemeleriniń ǵimarattary salynyp, Mádeniet úileri jóndele bastady.
Eki kúndik jumys saparymen óńirge kelgen oblys ákimi Amandyq Batalov aýdandaǵy san salaly jumystarmen jaqyn tanysty. Aldymen at basyn «Kóktal-Agro» JShS eginjaiyna burǵan oblys basshysy, jasyl teńizdei jer betine jaiqalyp ósip shyqqan júgeri alqabyn kórip, qoldanylǵan jańa tehnologiianyń tiimdiligin baǵamdady.
Oblys ákimine júgerishiler jumysyn aýdan ákimi Berdáýlet Abdýldaev pen «Kóktal-Agro» JShS tóraǵasy J. Ohanov baiandady. Seriktestik biyl 273 gektar jerge júgeri ósirse, sonyń 223 gektaryna tamshylatyp sýarý ádisin qoldanypty. Onyń 90 gektary №1, 76 gektary №2 jáne 107 gektary №3 brigadalarǵa tiesili. Tamshylatyp sýarý ádisin jaz ailarynda sý tapshylyǵy bar alqaptarda paidalanýǵa basa nazar aýdarylǵan.
Óńirde aýylsharýashylyq óndiristik kooperativterin qurý úrdisi etek alýda. Solardyń biri Kóktal aýyldyq okrýginiń Aqqudyq aýylyndaǵy kásipker N. Qarabalaev qurǵan «Kóktal» kooperativi. Aýyl irgesinen jer alyp, Reseiden sútti iri qara malynyń tuqymyn satyp ákelip, siyr fermasynyń negizin qalaǵan ujym biyl alǵash buzaýlaǵan 20 qunajyndy saýyp, sút óndire bastamaqshy. Osy ferma qaqpasynda oblys basshysyna aýylsharýashylyq ónimderin óndiretin Sholaqai aýylynda qurylǵan «Abýov», Altyúi aýylyndaǵy «Aýǵanbaev» óndiristik kooperativteriniń de jumysy tanystyryldy. Jarkent qalasynyń irgesinde ashylǵan teri óńdep, qoi júnin jýatyn jańa zaýyt jańalyǵy da qyzyǵýshylyq týdyrdy.
Budan keiin Amandyq Ǵabbasuly «Almaty-Kókpek-Shonjy-Kóktal-Qorǵas» jolyn kúrdeli jóndeý jumystarymen tanysty. Jol-jónekei kúre jol boiyndaǵy Kóktal aýylynyń ókpe tusyndaǵy sol jaǵalaýyn qyzyl sý esken ótkelge arnaiy toqtap, jumysyn jańa bastaǵan kópir qurylysynyń basshylaryna birqatar eskertý jasady. Jylda selden zardap shegetin ótkelge biyl 82 metrlik jańa úlken kópir salynbaqshy. Oblys basshysyna Jarkent qalasynyń ortalyq «Jibek joly» kóshesinde jol qurylysynyń jalpy sipatyn kóz aldyǵa ákeletin taqta arqyly qurylys qarqyny tanystyryldy. Aýdan ortalyǵy men birneshe eldi mekendi kóktep ótetin jol qurylysyn sapaly júrgizý jaýapty tulǵalarǵa tapsyryldy. Ásirese eldi mekenderdegi jaiaý júrginshiler ótkeli men avtoturaqtardyń, aialdamalardyń qurylysynyń, kógaldandyrý jumystarynyń talapqa sai atqarylýyn qatań baqylaý aýdan basshysyna júkteldi. Jarkent qalasynyń ortalyq kóshesindegi jaryq shamdarynyń temir baǵanalaryn biiktetý máselesi de aityldy. Sonymen qatar, oblys basshysyna memlekettik «Nurly Jol», «Aqbulaq», «Óńirlerdi damytý» baǵdarlamalary boiynsha atqarylyp jatqan ister de tanystyryldy.
Kúrdeli jóndeýden ótkizilip jatqan aýdandyq aýrýhana ǵimaratyndaǵy jumys jaiyn oblys basshysyna bas dárigerdiń orynbasary Murat Muhametjanov baiandady. Ǵimarattyń hirýrgiia bóliminiń jartysy men jansaqtaý bólimindegi qurylys jumystary aiaqtalypty. Alaida munda qurylysshylar tyndyratyn is áli kóp. Qurylys jumystaryna bólingen 291 million teńgeni alǵan «Firma «LAN» jaýapkershiligi shekteýli seriktestiginiń ótken jyldyń qazan aiynda bastalǵan kúrdeli jóndeý jumystaryn belgilengen merzimde aiaqtaǵany abzal. Merdigerlermen áńgime barysynda Amandyq Ǵabbasuly jóndeý jumystarynyń sapaly atqarylýyna basa nazar aýdarýdy tapsyrdy. Jumystyń aiaqtalǵan jerlerindegi boiaýdyń solǵyndyǵyn, sapasyzdyǵyn kórsetti. Aýrýhana basshylaryna halyqqa meditsinalyq qyzmet kórsetý sapasyn joǵarylatý, óz mindetterin jaýapkershilikpen adal atqarý júktedi.
Tústen keiin oblys basshysy Jarkent qalasynyń soltústik shyǵysynda salynǵan turmystyq qatty qaldyqtardy óńdeý zaýytyn aralap kórdi. Qytailyq jabdyqtarmen jaraqtandyrylǵan jańa kásiporynnyń jergilikti halyqqa tigizer paidasy orasan mol. Eń áýeli ár otbasy óz úiinen shyǵarylǵan temir men áinekten basqa barlyq kúl-qoqysyn osy kásiporynǵa aqyly negizde ótkizedi. Bul eldi mekender men olardyń mańyn kóz súrindiretin qoqys úiindilerinen aryltpaq. Zaýyt direktory K. Ermuhanbetovtyń aitýynsha kásiporyn sol qaldyqtardan ózge óndiris oryndaryna óte qajet ónimder shyǵaryp saýdalaidy. Mysaly, Jarkentte jaqynda iske qosylǵan asfalt zaýyty osy kásiporyn óndiretin tehnikalyq maiǵa óte zárý eken.
Al, Jarkent qalasyndaǵy 300 oryndy jańa mekteptiń qurylysy tolyq aiaqtalyp, aldaǵy oqý jylynyń basynda paidalanýǵa berilmekshi. Degenmen, jańa mektep úiiniń keibir qabyrǵalaryna syzat túsip jarylǵany, jylý júiesindegi, ainalasyn abattandyrýdaǵy jáne basqa da tustaryndaǵy kemshilikter baiqalyp qaldy. Oblys ákimi merdiger qurylys uiymynyń basshylaryna osy kemshilikterdi talapqa sai jedel jóndeýdi tapsyrdy.
Myrzaǵali NURSEIIT
