Qazaqstanda tótenshe jaǵdai kezinde 225 adam máiithanaǵa jetkizilgen, - dep habarlaidy Tengrinews.kz agenttigi.
QR Bas prokýratýrasy men QR Densaýlyq saqtaý ministrligi QR Prezidenti janyndaǵy Ortalyq kommýnikatsiialar qyzmeti alańynda Qazaqstannyń qalalarynda bolǵan qaiǵyly oqiǵalar kezinde zardap shekkender men qaza bolǵandardyń sany týraly resmi málimdeme jasady.
QR Bas prokýratýrasy qylmystyq qýdalaý qyzmetiniń bastyǵy Serik Shalabaevtyń aitýynsha, elde tártipsizdikter kezinde jalpy 4578 adam zardap shekken, onyń ishinde 4553 adam jaraqat alǵan. Onyń 3393-i quqyq qorǵaý organdarynyń qyzmetkerleri.
"Búgingi tańda 4578 jábirlenýshi anyqtaldy, 4353-i jaralandy, onyń ishinde 3393 quqyq qorǵaý organdarynyń qyzmetkeri. TJ kezinde qaza tapqan 225 adam máiithanalarǵa jetkizildi. Olardyń bir bóligi teraktilerge qatysqan, ǵimarattar men quqyq qorǵaý qyzmetkerlerinen shabýyl jasaǵan qarýly banditter. Qaza bolǵandardyń ishinde 19 politsiia jáne ásker qyzmetkeri bar", - dedi ol OKQ brifinginde.
Vedomstvo ókilderi bul aldyn ala derekter ekenin atap ótti. Olar áli de naqtylanady jáne ózgerýi múmkin.
"Qylmys jasady degen kúdikpen 672 adam ýaqytsha ustaý izoliatoryna jetkizildi, onyń ishinde 446-sy sot sanktsiiasymen qamaýǵa alyndy. Qujattardy teksergennen keiin jáne prokýratýramen ustaýǵa negiz bolmaǵandyqtan 100-ge jýyq adam bosatyldy.
BP ár fakti boiynsha tiisti quqyqtyq baǵa berý arqyly muqiiat zertteletinin málimdedi.
Búgingi tańda jedel tergeý toptary 546 qylmystyq isti tergeýde, onyń ishinde 44 - terrorizm aktileri boiynsha, 34 - jappai tártipsizdikter boiynsha, 15 adam óltirý jáne basqalary", - dedi ol.
QR Densaýlyq saqtaý ministrliginiń qoǵammen bailanys departamentiniń direktory Ásel Artakshinovanyń málimetinshe, 2,6 myńnan astam adam meditsinalyq kómekke júgingen.
"265 adam aýrýhanalarda. Onyń 67-si aýyr halde. Qaitys bolǵan 225 naýqastyń 175-i meditsinalyq uiymdarda qaitys boldy", - dedi DSM ókili.
Sonymen qatar, oqiǵalar hronologiiasy jáne quqyq buzýshylyqtardy tergeý týraly derekter jariialanyp, halyqqa quqyqtyq, meditsinalyq jáne psihologiialyq kómek kórsetý boiynsha aqparat usynyldy.
QR BP qylmystyq qýdalaý qyzmetiniń bastyǵy Serik Shalabaevtyń aqparaty boiynsha, 1 qańtarda Mańǵystaý oblysynyń Jańaózen qalasynda saǵat 17:20-da qala ákimdiginiń janynda adamdar jinala bastady. Adamdar suiyltylǵan gaz baǵasyn tómendetý talabymen el basshylyǵynyń atyna beineótinish jazyp alyp, sol kúni saǵat 18:00-de tarap ketti.
2 qańtarda narazylyq bildirýshiler sany júzdegen adamǵa deiin artty, al aktsiiaǵa qatysýshylar ishki joldardy jaýyp tastady. Bul rette quqyq qorǵaý organdary kúshter men quraldardy qoldanbaǵan.
3 qańtarda narazylyq aktsiialary basqa qalalar men aimaqtarda bastaldy. Osy kúni Mańǵystaý oblysynyń turǵyndaryn qoldaý maqsatynda elimizdiń basqa jeti óńirinde (Atyraý, Aqtóbe, Almaty oblystary, BQO, Nur-Sultan, Almaty jáne ShQO) "beibit" mitingiler bastaldy.
4 qańtarda mitingiler jalǵasyp, óńirler sany 11-ge jetti, adamdar ruqsatsyz jappai jinala bastady.
Qatysýshylar sany 37 myń adamǵa (Almaty q., Nur-Sultan, Mańǵystaý, Aqtóbe, Qyzylorda oblystary) deiin kúrt artty. Almaty men Shymkentte qarýly shabýyldar men búlikter bastaldy.
Aita keteiik, sol kúnnen bastap quqyq qorǵaý organdary qyzmetkerlerge jáne ákimshilik ǵimarattarǵa jasalǵan shabýyldarǵa toitarys berý úshin ólimge ákelmeitin arnaiy quraldardy qoldana bastady.
5 qańtarda tártipsizdikter eldiń 11 óńirinde jalǵasty. Qatysýshylar sany 50 myńǵa jetti, qańtardyń 4-nen 5-ne qaraǵan túni terrorister Almaty qalasy ákimdiginiń ǵimaratyn jáne "Almaty" halyqaralyq áýejaiyn basyp aldy.
Qyzylordada shabýyldaýshylar 9 avtokólikti órtep jiberdi, Taldyqorǵanda oblys ákimdigi, politsiia jáne UQKD ǵimarattaryn basyp aldy.
Sondai-aq, BP ókili terroristerdiń is-qimylyn úilestirýdi jáne bailanys quraldaryn paidalanýyn boldyrmaý maqsatynda Internetke kirý shektelgenin atap ótti.
6 qańtarda Qaýipsizdik Keńesiniń sheshimimen elde antiterroristik operatsiia ótkiziletini jariialandy Osy kúnnen bastap quqyq qorǵaý organdary men Qarýly Kúshter terroristerdi joiý úshin qarý qoldana bastady.
7 qańtarda beibit narazylyq sharalary birneshe óńirde (Mańǵystaý, Atyraý, Aqtóbe, Qaraǵandy jáne Shyǵys Qazaqstan oblystarynda) jalǵasty.
8 qańtarda jaǵdai birtindep turaqtana bastady, azamattardyń ruqsatsyz jinalýy toqtatyldy.
Sondai-aq, Serik Shalabaev Memleket basshysynyń tapsyrmasy boiynsha BP "Almaty tragediiasynyń" jáne basqa óńirlerdegi terroristik shabýyldardyń barlyq sebepteri men egjei-tegjeiin anyqtap jatqanyn atap ótti. Quqyq qorǵaý organdary terroristik shabýyldarǵa qatysýshylardy anyqtaý jáne jazalaý, eldegi qoǵamdyq qaýipsizdikti tolyq qalpyna keltirý boiynsha barlyq qajetti sharalar qabyldanyp jatyr.
Sonymen qatar, Bas prokýratýra atalǵan barlyq oqiǵalar – bir tizbektiń bólikteri ekendigine, bul rette terroristerdiń is-qimyldary biryńǵai ortalyqtan úilestirilgenine senim bildirdi.
