Qańtar oqiǵasy kezinde mert bolǵan jandardyń aty-jónin jariialaýǵa qatysty elimizdiń Bas prokýratýrasy túsinik berdi, dep habarlaidy QazAqparat.
«Qańtar oqiǵasynda marqum bolǵandardyń árqaisysy qai jerde, qalai mert boldy - sonyń bárin anyqtaý úshin sot-meditsinalyq tekserý júrip jatyr. Ár ólim jaǵdaiynyń qalai bolǵanyna qatysty naqty dálel kerek. Mert bolǵandardyń arasynda kezdeisoq oqqa ushqandar da boldy. Olardyń sany - 20 adam. Naqty aitqanda, onyń 11-i - Almaty qalasynda, 8-i - Almaty oblysynda jáne bireýi - Taraz qalasynda», - dedi QR Bas prokýratýrasy arnaiy prokýrorlar qyzmetiniń basshysy Rizabek Ojarov «Qazaqstan» ulttyq telearnasynyń «Ashyq alań» qoǵamdyq-saiasi tok-shoýynyń efirinde.
Onyń aitýynsha, jappai tártipsizdik kezindegi kisi ólimine qatysty tergeý amaldary jalǵasyp jatyr.
«Qańtar oqiǵasy kezinde qaitys bolǵan jandardyń aty-jónin nege jariialamaisyzdar?» degen saýal qoiylyp jatyr. Aty-jónin aitpaýdyń birinshi sebebi - ár kisi ólimi boiynsha qylmystyq is áli tergelip jatyr. Is aiaqtalǵan joq. Ekinshiden, adami-etikalyq turǵydan túsinistikpen qaraǵan abzal. Sebebi mert bolǵandardyń artynda qalǵan jaqyndary bar. Erteń qoǵamda túrli suraqtar týyndaidy. Aitalyq, tizim shyqqan soń «ol kisi kim? buzaqy ma, álde kezdeisoq qurban boldy ma?» dep suraidy el. Tergeý organy retinde bizdiń tarapymyzdan kimniń qalai mert bolǵany jaily naqty aqparat pen dálel bolýy kerek», - deidi ol.
