Qańtardaǵy tártipsizdik kezinde kelgen zalaldy ótegen kúdiktiler qamaýdan bosatyldy. Bul týraly QR IIM Tergeý departamentiniń basshysy Sanjar Ádilov aitty, dep habarlaidy QazAqparat.
«Tergeý materialdary men nátijesin taldaý kezinde bóten múlikti urlaǵany úshin ustalǵandardyń kópshiligi alǵash ret zań buzǵan jastar ekendigi anyqtaldy. Mundai adamdarǵa tergeýshiler olardyń jeke basyn jáne oń minezdemesin eskere otyryp, bas bostandyǵynan aiyrýdan bólek shara qoldanady. Qazirgi kezde osy negiz boiynsha jáne kelgen zalaldy ótegen 326 kúdikti qamaýdan bosatyldy», - dedi Sanjar Ádilov ortalyq kommýnikatsiialar qyzmetinde.
Qazirgi ýaqytta ishki ister organy tergeýshileriniń qaraýyndaǵy qylmystyq ister boiynsha 155 adam qamaýda otyr.
Onyń barlyǵy aýyr jáne asa aýyr qylmys jasady dep kúdikke ilingen.
Spikerdiń aitýynsha, tártipsizdik kezinde Almaty oblysynyń turǵyny «Tehnodom» saýda úiinen quny 1 mln teńgeden asatyn 2 teledidar, shańsorǵysh jáne qar jinaityn mashinany urlaǵan.
Asyraýynda kámeletke tolmaǵan 2 balasy bar ekenin jáne zalaldyń ótelgenin eskere otyryp, tergeý satysynda kúdiktiniń bultartpaý sharasy qamaýdan úiqamaqqa ózgerdi.
Sondai-aq, sot jeke minezdemesin, jasaǵan isine tolyq ókinip, kelgen zalaldy ótegenin eskere otyryp, onyń bas bostandyǵyn 2,5 jylǵa shektedi.
«Taǵy bir oqiǵaǵa toqtalsaq, biylǵy 5 jáne 6 qańtarda Taldyqorǵan qalasyndaǵy jappai tártipsizdik kezinde Almaty oblysynyń úsh týmasy «Fora» dúkeninen quny 1 mln teńgeden asatyn 8 uialy telefon urlaǵan. Tergeý barysynda buryn sottalmaǵan eki kúdikti zalaldy ótegennen keiin bultartpaý sharasy úiqamaqqa ózgertildi, al urlyq úshin sottylyǵy bar úshinshi adam qamaýda qaldy. Qylmystyq isti sotqa jibergennen keiin, buryn sottalmaǵan eki adamnyń úsh jylǵa bas bostandyǵy shekteldi, al úshinshi sottylyǵy bar adam bas bostandyǵynan aiyryldy», - dedi Tergeý departamentiniń basshysy.
