Japondyq mánerlep syrǵanaýshy Kaori Sakamoto áielder arasyndaǵy álem chempionatynda birinshi oryndy jeńip aldy, dep habarlaidy QazAqparat Kyodo agenttigine silteme jasap.
Týrnir Frantsiianyń Monpele qalasynda ótýde.
Jeńimpaz qysqa jáne erkin baǵdarlamalar qosyndysy boiynsha 236,09 upai (80,32 + 155,77) jinady. Ekinshi oryndy Belgiia sportshysy Lýna Hendriks (217,70; 75,00 + 142,70) ielengen. Úzdik úshtikke amerikandyq Alisa Liý (211,19; 71,91 + 139,28) da kirdi.
Sakamoto 21 jasta, ol Beijiń Olimpiadasynda jekelei jáne komandalyq týrnirde qola júldeger atanǵan.
Álem chempionaty 27 naýryz kúni aiaqtalady.
