Japoniia imperatory Akihitonyń taqtan bas tartý rásimi saltanatty túrde ótkizildi. Rásim seisenbi, 30 sáýirde Tokiodaǵy imperator saraiynda ótti. Resmi túrde aldaǵy túnnen bastap Akihito imperator mindetin atqarýdy doǵarady, dep habarlady Azattyq.
Imperatordyń taqtan bas tartýyna bailanysty salt-joralǵy seisenbi kúni tańerteń bastalǵan. 85 jastaǵy Akihito Tokiodaǵy sarai aýmaǵynda ornalasqan sintoistik hramǵa kirip, kún qudaiy Amaterasýǵa qulshylyq jasap, imperator taǵynan ketetini týraly aitqan. Ańyz boiynsha, japon imperatorynyń áýleti Amaterasýdan ósip-óngen.
Taqtan bas tartý rásiminiń ózi uzaqqa sozylǵan joq. Akihito ózine ulttyq nyshan retinde qoldaý bildirgen barshaǵa alǵys aityp, jańa imperatordyń tusynda Japoniia men kúlli álemniń beibitshiligi men baqyty úshin qulshylyq qylatynyn málimdegen.
Japoniia premer-ministri Sindzo Abe ataýly oqiǵaǵa bailanysty sóilegen sózinde Akihitoǵa alǵys bildirdi.
Akihitonyń taqtan bas tartýymen Japoniiada 30 jylǵa jalǵasqan Heisei ("Qol jetken beibitshilik") dáýiri aiaqtalady. Akihito endi eshqandai resmi mindet atqarmaidy. Ol tipti 59 jastaǵy uly Narýhitonyń taqqa otyrý saltanatyna da qatyspaidy. Japoniianyń jańa, 126-imperatory Narýhitonyń taqqa otyrý rásimi 1 mamyrda ótedi. Onyń bilikke kelýimen Japoniiada "Reiva" ("Tártip pen úilesim") dáýiri bastalmaq.
Akihitonyń imperator taǵynan bas tartatyny týraly resmi aqparat 2017 jyly jeltoqsanda jariialanǵan. Imperatordyń óz erkimen taqtan bas tartýy Japoniia tarihynda sońǵy 200 jylda alǵash ret qaitalanyp otyr. Imperator áýleti álemdegi eń baiyrǵy monarhiialyq áýletke jatady. Japoniia konstitýtsiiasyna sáikes, imperator ultqa uiytqy tulǵa sanalady. Ol saiasatqa jáne kúndelikti el basqarý isine aralaspaidy.
