Foto: Azattyq.org
Qyrǵyzstan prezidenti Sadyr Japarov memlekettik "Kabar" aqparat agenttigine bergen suhbatynda Qyrǵyzstannyń burynǵy prezidentterimen Dýbaida kezdeskeni týraly aitty, dep habarlaidy Azattyq.
Onyń sózinshe, Dýbaida kezdesý uiymdastyrardan buryn Bishkekte Almazbek Atambaev pen Sooronbai Jeenbekov sóilesken. Japarov olar "bir-birin keshirip, tatýlasty" deidi.
"Odan keiin Dýbaida kezdesý uiymdastyryldy. Árqaisysymen jeke sóilesip, Dýbaiǵa shaqyrdym. Biraq olarǵa ózge de burynǵy prezidentter keletinin aitqan joqpyz. Ol ras. Óitpesek, keibiri kelmei qalýy múmkin edi. Kezdesý kezinde olardyń eshbirine qarjy nemese saiasi turǵydan qaryzdar emes ekenimdi, prezident bolǵanyma eshbiriniń qatysy joq ekenin aittym. Kezdesýdiń basty maqsaty – kelisimge kelý. Liderler kelisimge kelmese, olardy qoldaýshylarmen kelisimge kelý qiyn. Sol sebepti olar óz jaqtastaryn tatýlyqqa, birlikke shaqyrǵany jón" dedi Japarov.
Onyń sózinshe, burynǵy prezidentter bul bastamany qoldaǵan. Kezdesý tórt saǵatqa jalǵasqan.
Qyrǵyzstan prezidenti syrttai sottalǵan, Qyrǵyzstanǵa kelse, qamaýǵa alynýǵa tiis Qurmanbek Bákiev týraly suraqqa da jaýap bergen.
Japarovtyń sózinshe, kezdesý kezinde ol qyrǵyz bas prokýratýrasy 13 jyl ishinde Belarýsqa Bákievti ekstraditsiialaý týraly tórt ret suraý salǵanymen nátije shyqpaǵanyn aitqan.
"Konstitýtsiianyń 66-baby boiynsha, prezident halyq pen memlekettik biliktiń birligin qamtamasyz etýi qajet. Mindetimdi atqardym. Jaýapqa tartý máselesine keletin bolsaq, árbir adam óz kinási úshin qudaidyń aldynda, tarih pen zań aldynda jaýap beredi. Kóp adam kezdesýdiń maqsaty Bákievti elge qaitarý dep oilap otyr. Qaitarǵymyz kelse Dýbaiǵa emes, Bishkekke shaqyrar edik. Bákievten ózgelerdiń bári Bishkekke kele alady. Iá, Bákiev jóninde sot sheshimi bar. Eger Bishkekke kelse, qamaýǵa alynar edi. Biz zańǵa baǵynýymyz kerek" dedi Japarov.
Ol suhbatynyń qorytyndy bóliminde mundai kezdesýler jalǵasatynyn jáne barlyq saiasatkerdi bitistirýge daiyn ekenin aitqan.
18 aqpanda Qyrǵyzstan prezidenti Sadyr Japarov Facebook-tegi paraqshasynda burynǵy prezidenttermen kezdeskenin, olar bir-birin keshirgenin habarlaǵan.
Keiinirek Qyrǵyzstannyń burynǵy prezidenti Almazbek Atambaev bul kezdesý týraly pikirin aityp, "elde beibitshilik pen tatýlyq ornatý men Bákievterdi Qyrǵyzstanǵa oraltý – ekeýi eki bólek nárse" degen edi. Al Asqar Aqaev suhbatynda Sadyr Japarovtyń bastamasyn qoldaitynyn aitqan.
Burynǵy prezidentterdiń bulaisha bas qosýy Ortalyq Aziiadaǵy burynǵy sovet respýblikalarynda alǵash ret bolyp otyr. Qyrǵyzstan prezidentteriniń kópshiligi jappai qarsylyq aktsiialarynan keiin qyzmetinen ketip, olarǵa qatysty qylmystyq is qozǵalǵan.
Asqar Aqaev 1991-2005 jyldary, Qurmanbek Bákiev 2005-2010 jyldary, Roza Otýnbaeva 2010-2011 jyldary, Almazbek Atambaev 2011-2017 jyldary, Sooronbai Jeenbekov 2017-2020 jyldary Qyrǵyzstan prezidenti bolǵan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
