Sýret: president.kg
Qyrǵyzstan prezidenti Sadyr Japarov Bishkekte sheteldik stýdenttermen bolǵan oqiǵa týraly aitty. Qyrǵyzstan memleketi basshysynyń resmi saitynda osyǵan qatysty úndeý jariialandy.
Qyrǵyz Respýblikasy prezidenti úndeýinde:
"Qurmetti Qyrǵyzstan halqy, ókinishke qarai, bárimizdi alańdatyp otyrǵan jaǵymsyz oqiǵaǵa tap bolyp otyrmyz. Bolyp jatqan jaittyń mánin túsinbei, arandatýǵa boi aldyrǵan toptardyń áreketi halqymyz ben memleketimizge soqqy boldy.
13 mamyrda bolǵan oqiǵaǵa qatysty túrli aqparattar men beinematerialdar 18 mamyrda ǵalamtorda taraǵan soń saldaryn bárimiz kórdik. Iá, quqyq qorǵaý organdary der kezinde shara qoldanyp, óz áreketterin der kezinde jurtshylyqqa jariia etkende, bálkim, bulai bolmas pa edi", - dedi ol.
El prezidenti Ishki ister ministrligi 13 mamyrda bolǵan oqiǵaǵa qatysty kinálilerdi ustap, jedel is-sharalar júrgizgenin aitty.
"Ókinishke qarai, jaǵdaidy ýshyqtyrýǵa múddeli ózge kúshter muny paidalanyp úlgerdi. Otansúigish jastarymyzdyń shetel azamattarynyń zańsyz kóshi-qonyna tosqaýyl qoiyp, mundai áreketterge jol bergenderge qatań shara qoldaný talaby durys ekeni sózsiz.
Mundai talaptar buryn da aitylǵan. Tiisti mekemeler bul máselelerdi saralap, qajetti sharalardy qolǵa ala bastaǵany belgili", - dedi Japarov.
Eske salsaq, Bishkekte jergilikti turǵyndar sheteldikterdi soqqyǵa jyqqan soń jappai tártipsizdik bolǵanyn habarlaǵan edik. Keiin pákistandyq azamattar elshilik aldynda narazylyqqa jinaldy.
21 mamyrda Qyrǵyzstan men Pákistan SIM basshylary Astanada kezdespek.
.jpg)