سۋرەت: president.kg
قىرعىزستان پرەزيدەنتٸ سادىر جاپاروۆ بٸشكەكتە شەتەلدٸك ستۋدەنتتەرمەن بولعان وقيعا تۋرالى ايتتى. قىرعىزستان مەملەكەتٸ باسشىسىنىڭ رەسمي سايتىندا وسىعان قاتىستى ٷندەۋ جارييالاندى.
قىرعىز رەسپۋبليكاسى پرەزيدەنتٸ ٷندەۋٸندە:
"قۇرمەتتٸ قىرعىزستان حالقى, ٶكٸنٸشكە قاراي, بەرٸمٸزدٸ الاڭداتىپ وتىرعان جاعىمسىز وقيعاعا تاپ بولىپ وتىرمىز. بولىپ جاتقان جايتتىڭ مەنٸن تٷسٸنبەي, ارانداتۋعا بوي الدىرعان توپتاردىڭ ەرەكەتٸ حالقىمىز بەن مەملەكەتٸمٸزگە سوققى بولدى.
13 مامىردا بولعان وقيعاعا قاتىستى تٷرلٸ اقپاراتتار مەن بەينەماتەريالدار 18 مامىردا عالامتوردا تاراعان سوڭ سالدارىن بەرٸمٸز كٶردٸك. يە, قۇقىق قورعاۋ ورگاندارى دەر كەزٸندە شارا قولدانىپ, ٶز ەرەكەتتەرٸن دەر كەزٸندە جۇرتشىلىققا جارييا ەتكەندە, بەلكٸم, بۇلاي بولماس پا ەدٸ", - دەدٸ ول.
ەل پرەزيدەنتٸ ٸشكٸ ٸستەر مينيسترلٸگٸ 13 مامىردا بولعان وقيعاعا قاتىستى كٸنەلٸلەردٸ ۇستاپ, جەدەل ٸس-شارالار جٷرگٸزگەنٸن ايتتى.
"ٶكٸنٸشكە قاراي, جاعدايدى ۋشىقتىرۋعا مٷددەلٸ ٶزگە كٷشتەر مۇنى پايدالانىپ ٷلگەردٸ. وتانسٷيگٸش جاستارىمىزدىڭ شەتەل ازاماتتارىنىڭ زاڭسىز كٶشٸ-قونىنا توسقاۋىل قويىپ, مۇنداي ەرەكەتتەرگە جول بەرگەندەرگە قاتاڭ شارا قولدانۋ تالابى دۇرىس ەكەنٸ سٶزسٸز.
مۇنداي تالاپتار بۇرىن دا ايتىلعان. تيٸستٸ مەكەمەلەر بۇل مەسەلەلەردٸ سارالاپ, قاجەتتٸ شارالاردى قولعا الا باستاعانى بەلگٸلٸ", - دەدٸ جاپاروۆ.
ەسكە سالساق, بٸشكەكتە جەرگٸلٸكتٸ تۇرعىندار شەتەلدٸكتەردٸ سوققىعا جىققان سوڭ جاپپاي تەرتٸپسٸزدٸك بولعانىن حابارلاعان ەدٸك. كەيٸن پەكٸستاندىق ازاماتتار ەلشٸلٸك الدىندا نارازىلىققا جينالدى.
21 مامىردا قىرعىزستان مەن پەكٸستان سٸم باسشىلارى استانادا كەزدەسپەك.
.jpg)