«Janýarlarǵa jaýapkershilikpen qaraý týraly» zań 2 naýryzdan bastap óz kúshine enedi. Bul týraly QR Ekologiia, geologiia jáne tabiǵi resýrstar vitse-ministri Áliia Shalabekova aitty, dep habarlaidy QazAqparat.
«Memleket basshysy 2021 jyly 30 jeltoqsanda biylǵy jyldyń 2 naýryzynan bastap kúshine enetin «Janýarlarǵa jaýapkershilikpen qaraý týraly» Zańǵa qol qoidy. Qazirgi ýaqytta buryn-sońdy zańnamamen qamtylmaǵan quqyqtyq qatynastardy retteýdiń negizgi qaǵidalary belgilendi. Jańa zańǵa sáikes, azamattardy adamgershilikke tárbieleý ideologiiasy janýarlarǵa aýyrsynýdy sezinetin tirshilik ieleri retinde qaraý, janýarlardyń ómiri, densaýlyǵy men ál-aýqaty úshin ieleriniń jeke jaýapkershiligi, olardy qatygezdikten qorǵaý, halyqtyń olarǵa moraldyq jáne adamgershilik kózqarasyn tárbieleý bolyp otyr», - dedi spiker Ortalyq kommýnikatsiialar qyzmetinde ótken baspasóz máslihatynda.
Atap aitqanda, osy zań arqyly jekelegen sanattaǵy janýarlardy mádeni oiyn-saýyq, eksperimenttik, qyzmettik maqsattarda, úidegi, qaraýsyz jáne qańǵybas janýarlardy asyraý jáne ustaý kezindegi talaptar belgilengen.
«Sondai-aq, barlyq buqaralyq aqparat quraldarynda janýarlarǵa qatygezdikpen qaraýdy nasihattaýǵa tyiym salynady. Zań erejelerin iske asyrý úshin qazirgi ýaqytta bizdiń ministrlik qoǵam talqysynan jáne quzyretti memlekettik organdarmen kelisý rásimderinen ótetin normativtik-quqyqtyq akt jobalaryn ázirledi», - dedi Á. Shalabekova.
Ministrlik ókili úi janýarlaryna asyraýdy retteýge baǵyttalǵan normativtik-quqyqtyq akt jobalary týraly aityp berdi.
Olar:
úi janýarlaryn ustaý men serýendetýdiń tiptik erejeleri;
úi janýarlaryn esepke alý erejeleri;
janýarlardy tasymaldaý erejeleri;
esepke alynatyn úi janýarlarynyń tizbesi;
turǵyn úilerde ustaýǵa tyiym salynǵan janýarlardyń tizimi;
janýar iesiniń erekshe jaýapkershiligin qajet etetin úi janýarlarynyń tizimi.
