Ekologiia, geologiia jáne tabiǵi resýrstar ministri Maǵzum Myrzaǵaliev janýarlarǵa qatygezdikti, tabiǵatqa varvarlyq kózqarasqa qarsy kúreske atsalysqan azamattarǵa alǵysyn bildirdi, dep habarlaidy "Ult aqparat".
«Búgingi tańda biz azamattardan orasan zor qoldaý alyp otyrmyz dep senimmen aita alamyn. Janýarlarǵa qatygezdikti, tabiǵatqa varvarlyq kózqarasty, ár rezonanstyq jaǵdaidy azamattar tez arada habarlap, jariialap otyrady. Bul – durys. Mundai faktilerdi jasyrýǵa bolmaidy. Janýarlar men ósimdikterge degen osyndai kózqaras ekologiialyq bilimniń, ekologiialyq mádeniettiń jetkiliksiz bolýynan týyndaidy», - dedi ministr OKQ-da ótken baspasóz máslihatynda.
Maǵzum Myrzaǵaliev ministrlik tabiǵatqa, qorshaǵan orta jaǵdaiyna bei-jai qaramaityn azamattarmen belsendi túrde jumys istep kele jatqanyn atap ótti.
«Birlesip is-sharalar, senbilikter, qoqystardy tazartý, aǵash otyrǵyzý boiynsha aktsiialar ótkizýdemiz. Árine, ótken jyly pandemiiaǵa bailanysty mundai sharalardy qysqartýǵa májbúr boldyq. Biyl osyndai aktsiialardy jii ótkize alamyz dep úmittenemin», - dedi ol.
