Búgin Ońtústik Qazaqstan oblysynda Rýhani jańǵyrý baǵdarlamasy aiasynda dóńgelek ústel ótti. Oblys ákimi Janseiit Túimebaev tóraǵalyq etken jiynǵa aqsaqaldar men ziialy qaýym ókilderi qatysty, dep habarlaidy"Ult aqparat".
«Rýhani jańǵyrý: Bereke basy - birlik» atty jiyn jyl boiy atqarylǵan jumystarǵa baǵa berip, aldaǵy atqarylar jumystardy talqylaý maqsatynda uiymdastyryldy. Memleket basshysynyń «Bolashaqqa baǵdar: rýhani jańǵyrý» baǵdarlamalyq maqalasynyń jaryq kórgenine jeti aidan asa ýaqyt ótti. Sodan beri elimizde, onyń ishinde Ońtústik Qazaqstan oblysynda da ideologiia salasynda qoǵamdyq sanany jańǵyrtý baǵytynda túrli jobalar qolǵa alynyp keledi. Aýqymdy jumystar atqarylýda. Dóńgelek ústel barysynda sóz alǵan óńir basshysy Elbasy maqalasyn júzege asyrý maqsatynda 66 joba boiynsha 121 is-sharany júzege asyrý qolǵa alynǵanyn jetkizdi.
«Elbasynyń «Bolashaqqa baǵdar: rýhani jańǵyrý» baǵdarlamalyq maqalasyn júzege asyrý barysynda aldaǵy kezde talapty kúsheite túsemiz. Oblystaǵy 720 myńnan astam jyljymaityn múliktiń kelbetin kóriktendirýge qol jetkizemiz. Álbette, bul rette sizderdiń kómekterińizge súienetin bolamyz. Jastarymyzdyń tálim-tárbiesine, bilimine asa kóńil bólýimiz qajet. Osy turǵyda Sizderdiń qosar úlesterińiz orasan zor. «Qarty bar el - qazynaly el» degendei, Sizder bizdiń qazynamyz bolýmen qatar, baǵyt-baǵdar beretin danalyqtyń sarqylmas bulaǵysyzdar», - dedi Janseiit Qanseiituly.
Kezdesýde oblystyq ardagerler keńesiniń tóraǵasy Jeńisbek Máýlenqulov baiandama jasap, eldi birlik pen yntymaqqa shaqyrýda ardagerlerdiń eńbegi orasan ekenin atap ótti. Ol sondai-aq qariialardy Elbasy maqalasynyń el arasynda óz deńgeiinde nasihattalýyna kúsh salýǵa shaqyrdy.
«Búgingi tańda oblysymyzda qyrýar tirlikter atqarylyp jatyr. Óńirdiń áleýmettik-ekonomikalyq damý kórsetkishteri de jyl sanap jaqsaryp keledi. Memleket tarapynan barlyq salalarǵa qoldaý qarjy men qajetti qamqorlyq kórsetilip otyr. Búgingi qoǵamnyń onyń ishinde jastar tárbiesine, otbasy qundylyqtaryn saqtaý, aýyzbirlik pen yntymaqqa shyqyrý, halyqty Elbasymyz kórsetip otyrǵan baǵyt-baǵdarmen habardar etý osynda otyrǵan barsha abyz-aqsaqaldarymyzdyń eń basty mindetteri dep sanaimyn», - dedi Jeńisbek Máýlenqulov.
Munan soń eńbek ardagerleri men tyl eńbekkerleri, Saryaǵash aýdandyq ardagerler keńesiniń tóraǵasy men respýblikalyq «Dostyq» ózbekter qaýymdastyǵynyń tóraǵasy Ikram Hashimjanovtar sóz sóilep, Elbasymyzdyń «Bolashaqqa baǵdar: rýhani jańǵyrý» baǵdarlamalyq maqalasyn birlesip júzege asyrý jóninde óz oi-pikirlerin ortaǵa saldy.
Aita keteiik, búginde oblysta Elbasynyń «Bolashaqqa baǵdar: rýhani jańǵyrý» baǵdarlamalyq maqalasyn júzege asyrý maqsatynda 844 eldi mekende 3185 is-shara ótkizilgen. Maqalada erekshe atalǵan jobalardy júzege asyrýǵa 2022 jylǵa deiin 16,2 mlrd teńge bólý josparlanyp otyr. Jyl basynda «Atameken» kishi baǵdarlamasy aiasynda oblystan shyqqan 205 tulǵanyń qatysýymen «Týǵan jerdi túletý - perzenttik paryz» basqosýy joǵary dárejede uiymdastyryldy. Búgingi kúnde óńirde kásipkerler, demeýshiler tarapynan jalpy 30 mlrd. 350 mln. teńgeni quraityn 529 óńirlik joba qolǵa alynyp otyr.
Budan bólek, «Rýhani qazyna» kishi baǵdarlamasy boiynsha «Ajarly úi - yrysty» jobasy aiasynda 120-dan astam belsendi, erikti jastar eldi mekenderdi abattandyrý maqsatynda kómekke zárý 543 otbasynyń aýlalaryn tazalap, qorshaýlaryn, qaqpalaryn syrlap, aýyl ajarynyń artýyna óz úlesterin qosqan.
Munan soń jiyn suraq-jaýap úlgisine kóshti. Kezdesý sońynda oblys ákimi barsha ardagerlerge syi-siiapat jasady.
