Memleket basshysynyń Ókimimen Janseiit Qanseiituly Túimebaev Qazaqstan halqy Assambleiasy Tóraǵasynyń orynbasary, Qazaqstan Respýblikasy Prezidenti Ákimshiliginiń Qazaqstan halqy Assambleiasy hatshylyǵynyń meńgerýshisi qyzmetine taǵaiyndaldy, dep habarlaidy "Ult aqparat" Aqordaǵa silteme jasap.
Janseiit Qanseiituly Túimebaev 1958 jyly Ońtústik Qazaqstan oblysynda dúniege kelgen, filologiia ǵylymynyń kandidaty, professor. Qazaq memlekettik ýniversitetin, Máskeý memlekettik áleýmettik ýniversitetiniń zan fakýltetin bitirgen.
1980-1993 jyldary - Qazaq memlekettik ýniversitetinde oqytýshy, dotsent.
1993-1994 jyldary - Qazaqstan Respýblikasy Syrtqy ister ministrliginiń birinshi hatshysy, bólim bastyǵy.
1997-1999 jyldary - Qazaqstan Respýblikasy Prezidenti protokol qyzmetiniń bas sarapshysy, Qazaqstan Respýblikasynyń Ystanbul qalasyndaǵy Bas konsýly.
1999-2006 jyldary - QR Prezidenti protokolynyń jetekshisi.
2004-2006 jyldary - Qazaqstan Respýblikasy Prezidenti protokolynyń jetekshisi - Qazaqstan Respýblikasy Prezidentiniń keńesshisi.
2006-2007 jyldary - Qazaqstan Respýblikasynyń Bilim jáne ǵylym ministri.
2007-2010 jyldary Resei Federatsiiasyndaǵy Tótenshe jáne Ókiletti Elshisi.
2010-2016 jyldary Qazaqstannyń Túrkiiadaǵy tótenshe jáne ókiletti elshisi bolyp qyzmet atqardy.
2016 jylǵy 6 qazanda Ońtústik Qazaqstan oblysynyń ákimi bolyp taǵaiyndalǵan bolatyn. Ótken jyly 20 maýsymda qaita qurylǵan Túrkistan oblysyna ákim bolyp taǵaiyndaldy.
"Qazaq tiliniń tarihi grammatikasy", "Qazirgi qazaq tiliniń leksikologiiasy", "Qazaq tili", "Qazaq tili: Grammatikalyq anyqtamalyq", t.b. kitaptardyń avtory. "Qurmet" ordenimen, medaldarmen marapattalǵan.
Aita ketý kerek, búgin Memleket basshysynyń Ókimimen Leonid Andreevich Prokopenko basqa jumysqa aýysýyna bailanysty Qazaqstan halqy Assambleiasy tóraǵasynyń orynbasary, Qazaqstan Respýblikasy Prezidenti Ákimshiliginiń Qazaqstan halqy Assambleiasy hatshylyǵynyń meńgerýshisi qyzmetinen bosatyldy.
