Búgin M.Áýezov atyndaǵy Ońtústik Qazaqstan Memlekettik ýniversiteti 75 jyldyq mereitoiyn atap ótti. Merekelik jiyn bilim ordasynyń aldynan boi kótergen uly jazýshy, ǵulama ǵalym Muhtar Omarhanuly Áýezovtyń eńseli eskertkishiniń ashylý rásimimen bastaldy.
Saltanatty sharaǵa Bilim jáne ǵylym ministri Erlan Saǵadiev, Túrkistan oblysynyń ákimi Janseiit Túimebaev, oqý oryn basshylary men stýdentter jáne túrli salada eseli eńbekterimen el abyroiyn asqaqtatyp júrgen ýniversitet túlekteri qatysty.
Túrkistan oblysynyń ákimi óziniń quttyqtaý sózinde irgesi qalanǵaly el damýyna súbeli úles qosyp kele jatqan oqý orynnyń ustazdaryna alǵys bildirdi.
«75 jyldyq tarihy bar bilim ordasy úshin biylǵy jyl tolaǵai tabystarǵa toly boldy. Atap aitsaq, elimizdegi joǵary oqý oryndarynyń reitingisinde III-oryndy ielense, QS reitingisi boiynsha álemdegi 4,5 myń joǵary oqý oryndarynyń ishinde 609-dan 501-shi orynǵa kóterildi. Bul osynda uzaq jyldar boiy eńbek etip kele jatqan oqytýshy-professorlardyń eren eńbegi dep aitar edim. Jalpy Túrkistan óńirinde 500 myńnan asa jas bar. Munda oqityn stýdentterdiń basym kópshiligin oblysymyzdyń jastary quraidy. Endeshe osynda bilim alyp, óz salasynyń úzdigi atanǵan bitirýshi túlekter túrki dúniesiniń ortalyǵyna ainalǵan Túrkistan oblysynda ózderiniń jańa múmkindikterin júzege asyrady dep senim bildiremin», – dedi Janseiit Qanseiituly.
Shara barysynda belsendi qoǵamdyq qyzmeti jáne bilim berý men tárbie isi protsesterin uiymdastyrýda eńbek etken ýniversitettiń birqatar qyzmetkerleri «Ybyrai Altynsarin», «Ǵylymdy damytýǵa sińirgen eńbegi úshin», «Bilim berý isiniń qurmetti qyzmetkeri», «Eńbek ardageri» tósbelgilerimen, sondai-aq oblys jáne qala ákimderiniń alǵys hattarymen marapattaldy. Sonymen qatar, elimizdiń igi isteri men jańashyl bastamalarynyń aldyńǵy sapynan tabylyp júrgen oqý orynnyń túlekteri – QR Ulttyq Ǵylymdar Akademiiasynyń prezidenti, tehnika ǵylymdarynyń doktory, professor, akademik M.Jurynovqa, ekonomika ǵylymdarynyń kandidaty, 1973 jyldan QazHTI komsomol komitetiniń hatshysy, qoǵam qairatkeri, 1993-1997 jyldary OQO ákimi qyzmetin atqarǵan Z.Turysbekovke jáne birqatar memleket jáne qoǵam qairatkerlerine erekshe qurmet kórsetildi.
Aita keteiik, Shymkent qalasyndaǵy atalǵan bilim ordasy 1943 jyly qurylys materialdary tehnologiialyq institýty bolyp qurylǵan. Qazirgi tańda, munda 1700 oqytýshy-professor, 136 ǵylym doktor, 646 ǵylym kandidaty men dotsent 20 myńnan astam shákirtke dáris berip keledi. 75 jylda ýversitetten 100 myńǵa jýyq stýdent túlep ushqan.
