Astanada QR Mádeniet jáne sport ministrliginiń uiymdastyrýymen Elordasy – Astana qalasynyń 20 jyldyǵyna jáne Táýelsizdik kúni merekesine orai VII «Altyn dombyra» respýblikalyq aqyndar aitysy ótti.
Biyl 7-shi ret ótken «Altyn dombyra» aitysyna jyl boiy ótken dodalardyń jeńimpazdary qatysty. Iaǵni, jyl boiy ótken jyr saiystarynda jeńimpaz atanǵan 20 aqyn qorytyndy aitysta baq synady. Atap aitsaq, Aibek Qaliev, Rinat Zaitov, Rústem Qaiyrtaiuly, Muhtar Niiazov, Aspanbek Shuǵataev, Erkebulan Qainazarov, Jansaia Mýsina, Meiirbek Sultanhan, Ásem Erejeqyzy, Maqsat Aqanov, Bolatbek Orazbaev, Didar Qamiev, Tólegen Jamanov, Tilegen Ádilov, Nurmat Mansurov, Shalqarbai Izbasarov, Qaziret Berdihan, Syrym Ádilbek, Serik Qýanǵan sekildi jyr júirikteri «Altyn dombyra» iegerin ózara anyqtady.
Birinshi kúngi aitysta 10 jup sóz saiysyna túsip, úzdik shyqqandary finalǵa joldama aldy. Aqtyq synda alty jup sahnaǵa kóterilip, aitys jeńimpazdary anyqtaldy.
Sonymen, eki kúnge sozylǵan jyr dodasynyń Bas júldesin batysqazaqstandyq Jansaia Mýsina jeńip alyp, «Altyn dombyra» iegeri atandy.
Birinshi orynǵa qaraǵandylyq Didar Qamiev ie bolsa, ekinshi oryndy Erkebulan Qainazarov (Túrkistan) pen Meiirbek Sultanhan (Shieli) enshiledi. Al, Rinat Zaitov (Aiagóz), Rústem Qaiyrtaiuly (Semei), Maqsat Aqanov (Qaraǵandy) úshinshi oryndy ózara bólisti.
Sondai-aq, aqyn Tólegen Jamanov «TasKredit» kompaniiasy basshysynyń arnaiy stependiiasyna ie bolsa, aqyn Bolatbek Orazbaevqa Asanáli Áshimovtyń arnaiy júldesi buiyrdy. Jáne de Qaziret Berdihan, Aibek Qaliev, Muhtar Niiazovtar da arnaiy júldege ie boldy.
Sonymen qatar, birqatar aitys aqyny "Mádeniet salasynyń úzdigi" atandy. Aqyndardy tósbelgimen QR Mádeniet jáne sport ministri A.Muhamediuly marapattady. Atap aitsaq, Ahmetjan Ózbekov, Jansaia Mýsina, Aibek Qaliev, Baqyt Qutpanov, Baýyrjan Haliolla, Rinat Zaiytov, Erkebulan Qainazarov, Rústem Qaiyrtaiuly, Meiirbek Sultanhan arnaiy marapatqa ie boldy.
