Qazaq ulttyq óner ýniversitetiniń stýdentteri men oqytýshylary, sondai-aq eordalyq tyńdarmandar shyǵarmashylyǵy álemge áigili, tanymal ánshi Dimash Qudaibergendi Nursultan Nazarbaev halyqaralyq áýejaiynan kútip aldy, dep habarlaidy QazAqparat.
«Niý-Iorktiń Barclays Center úlken álemdik sahnasynda qazaq ánderi shyrqaldy. Álemniń 60 elinen tyńdarmandar keldi. Bizdiń qazaqtyń jalaýyn ustap turǵanynan olardyń bizdiń elge degen qurmetin baiqaýǵa bolady. Bul - biz úshin ǵana emes, elimiz úshin de úlken mártebe. Elge degen qurmet - birinshi kezekte, qazaq jerine, mádenieti men ónerine degen qurmet. Dimashtyń ánderin súiip tyńdaityn barshańyzǵa alǵysymdy aitamyn, sondai-aq qoldaý kórsetken elimizdiń basshylyǵyna sheksiz rizamyz», - degen aqjarma tilegin bildirdi Dimash Qudaibergenniń ákesi ári prodiýseri Qanat Aitbaev.
Áýejaiǵa QazUÓÝ stýdentteri ǵana emes, fanklýbtar men qarapaiym turǵyndar da kelgen. Tipti halyqtyń súiiktisi, talantty ánshini qoldaý úshin elordaǵa arnaiy kelgen qonaqtar da bar. Olar ánshini zor qoshemetpen, gúl shoǵymen jáne syilyqtarymen qarsy aldy. Kútip alýshylar ánshiniń sýreti men qoltańbasy bar fýtbolkalar kiip, arnaiy plakattar daiyndaǵan eken.
Eske sala keteiik, QR Táýelsizdik kúnine orai Dimash Qudaibergenge «Qazaqstannyń eńbek sińirgen qairatkeri» qurmetti ataǵy berildi.
Aita keteiik, álemge tanymal qazaq oryndaýshysy Dimash Qudaibergenniń Niý-Iorktegi kontserti úlken anshlagpen ótken bolatyn. Álemdik sahnada ol halyq ánderin shyrqady. Al ony tyńdaýǵa AQSh, Avstraliia, Meksika, Resei, Chili, Bolgariia, Filippin, Ispaniia, Kanada, Qazaqstan, Japoniia siiaqty 60 elden tyńdarmandar keldi.
