Álemdik ústel tennisi Olimpine týra jol salyp kele jatqan jas sportshy – Qostanai oblysynyń týmasy Jániia Bekmuhambetova. Bar bolǵany 12 jasta bolsa da, ol tek ótken jyldyń ózinde segiz halyqaralyq jarysta jeńiske jetken. Al biyl Jániia óz sheberligin taǵy bir dáleldep, Batýmide ótken Youth Contender Batumi 2025 jasóspirimder arasyndaǵy halyqaralyq týrnirinde jańa jeńisine qol jetkizdi, dep habarlaidy Ult.kz Toppress.kz-ke silteme jasap.
2025 jylǵy 18–21 qyrkúiek aralyǵynda Grýziianyń Batými qalasynda ótken jarysqa Ázerbaijan, Angliia, Frantsiia, Belarýs, Izrail, Qazaqstan, Litva, Moldova, Polsha, Soltústik Makedoniia, BAÁ, Bolgariia, Niderland, Úndistan, Túrkiia jáne Ýkrainadan sportshylar qatysty.
Bul týrnirde Bekmuhambetova U13 jáne U15 jas sanattarynda birdei óner kórsetti.
«Jarystyń ózinde Jániia óz oiynyn joǵary deńgeide kórsetti. Finalda ol Úndistannan kelgen qarsylasy — Kavia Gýptany (Aziia chempiony – red.) jeńdi. Sondai-aq Túrkiiadan kelgen sportshy da myqty boldy. Bul qyzdardy italiialyq mamandar jattyqtyrady, olardy álem chempionattaryna daiyndaidy», – dedi Qostanai oblysynyń aǵa jattyqtyrýshysy Ǵaiyp Daniiarov.
Tórttik finalda Jániia Ázerbaijan sportshysy Sofiia Trofimenkony jeńdi. Jartylai finalda Túrkiiadan kelgen Belinai Davýsty 3:1 esebimen tize búktirdi. Al finalda Úndistan ókili Kavia Gýptamen kezdesip, 3:1 esebimen altyn medal ielendi.
Aita ketsek, jas qazaqstandyq sportshy ústel tennisine bar bolǵany 5 jyl buryn kelgen. Degenmen ol nebári 11 jasynda Horvatiiada ótken WTT Youth Contender týrnirinde óz jas sanatynda sensatsiialyq jeńiske jetken bolatyn.
«Ótken jyly U11 sanatynda álemdik reitingte ol barlyq sportshylardyń ishinde álemde ekinshi orynda boldy. Endigi maqsatymyz – Jániiany jasóspirimder Olimpiadasyna daiyndaý, keiinirek eresekter quramasyna qosý. Bul úshin shamamen 1–2 jyl jumys qajet», – deidi Ǵaiyp Daniiarov.
Jániianyń jeke bapkeri, №2 balalar men jasóspirimder sport mektebiniń jattyqtyrýshysy Iýliia Daniiarova onyń kún saiyn úsh saǵat jattyǵatynyn, soǵan qaramastan mektepte de jaqsy oqitynyn aitady.
Qazir Jániia Bekmuhambetova álemdik reitingte U13 sanatynda 12-orynda tur.
Aita ketý kerek, Allur kompaniiasy ústel tennisi jarystarynyń turaqty seriktesi bolyp tabylady. Kompaniia Qostanai oblysynda bul sport túriniń damýyna eleýli úles qosyp keledi, sondai-aq qazaqstandyq tennisshilerdiń halyqaralyq jarystarǵa qatysýyna qoldaý kórsetip, daiyndyqqa qajetti resýrstarmen qamtamasyz etedi.
