Sheteldik jumys kúshine kvota qysqarsa, eldegi jumyssyzdar sany da azaiady. Ulttyq qoǵamdyq senim keńesiniń ekinshi otyrysynda Prezident tarapynan aitylǵan máselege qatysty qoǵam belsendisi Jánibek Qojyq osylai pikir bildirdi, dep habarlaidy "Ult aqparat".
Eske sala ketsek, Jánibek Qojyq — ózi de sol Ulttyq keńes múshesi. Osyǵan orai ol sheteldik jumysshylar jáne eldegi jumyssyzdyq máselesi buǵan deiingi otyrys aiasynda kóterilgenin atap ótedi. Jánibek Qojyqtyń aitýynsha, Ulttyq keńes jumysyn synaityndar da, quptaityndar da barshylyq. Bul, árine, zańdylyq, qoǵamdaǵy oi men pikirdiń erkindigi. Sondyqtan da ol barlyq pikirlerge túsinistikpen qaraitynyn alǵa tartady.
«Eń bastysy elime, jerime, qarapaiym aýyl halqyna sál de bolsa paidam tisin degen maqsatpen osy keńeske kirdim. Men aýylda turamyn, aýyl halqynyń eń basty máselesi - jumyssyzdyq. Jastar jumys izdep qalaǵa kóshýde, soǵan qaraǵanda qalanyń jaǵdaiy, aýylǵa qaraǵanda shúkir bolar dep oilaimyn», - dep jazady Jánibek Qojyq áleýmettik jelide.
Ulttyq keńestiń alǵashqy otyrysy 6 qyrkúiekte ótken bolatyn. Onda Jánibek Qojyq ta jumyssyzdyq máselesin jáne ony azaitýdyń joldary týraly másele kótergen eken.
«Eń bastysy, shetelden keletin jumysshylarǵa beriletin kvotanyń sanyn qysqartý, zańsyz kelgenderin elden shyǵarý, olardyń ornyna jumyssyz júrgen jastardy jumysqa qabyldaýdy suraǵan bolatynmyn. Ulttyq keńestiń 20 jeltoqsandaǵy ótken ekinshi otyrysynda Memleket basshysy Qasym-Jomart Toqaev myrza shetelden keletin jumysshylarǵa beriletin kvotanyń sanyn qysqartyp, olarǵa qoiylatyn talaptardy kúsheitip, bul jaǵdaidy qatań baqylaýǵa alatynyn aitty», - dedi ol.
Jánibek Qojyqtyń oiynsha, sol qysqarǵan sheteldik jumysshylardyń ornyna jumyssyz júrgen myńdaǵan jastar jumysqa kiretin bolady.
«Bul teńizge tamǵan tamshydai bolsa da elge tigen paida ǵoi. Sondyqtan da Ulttyq keńeske kirgenim úshin, ázirge, ókinbeimin. Múmkindigiń bolyp turǵanda Ulttyq keńesti eldiń múddesine nege paidalanbasqa, nege eldiń amanatyn bilikke týra aitpasqa?! Álde de talai aitar usynystarym, mańyzdy máselelerim bar»,-dep jazdy qoǵam belsendisi.
