Jeńilip kórmegen qazaqstandyq boksshy Jánibek Álimhanuly (10-0, 6 KO) búgin AQSh-ta WBA-diń eks-chempiony Rob Brantty (26-3, 18 KO) jeńgennen keiin óz divizionyndaǵy kil myqtylardy jekpe-jekke shaqyrdy, dep habarlaidy "Ult aqparat".
«Jeńisterińiz qutty bolsyn, Qazaq eli! Allaǵa shúkir! Mansabymyzdyń jańa belesine shyqtyq. Biz myqtymyz. Bizdiń stil myqty. Buiyrtsa QAZAQ STYLE-di tarihta qaldyramyz. Qoldaýlaryńyzǵa kóp raqmet!», - dep jazdy boksshy Instagram-daǵy paraqshasynda.
Sondai-aq Jánibek Twitter-akkaýntynda chempiondarǵa qarata aǵylshyn tilinde tvit jazdy.
«Chempiondar, qaidasyńdar? Senderdi nokaýtqa jibergim keledi», - dedi ol.
Eske salaiyq, búgin AQSh-tyń Las-Vegas qalasynda ótken boks keshinde Jánibek Álimhanuly amerikalyq Rob Brantpen jekpe-jek ótkizip, jeńiske jetti. Ol altynshy raýndta qarsylasyn nokdaýnǵa jiberdi. Keiin R.Brant toǵyzynshy raýndqa shyǵýdan bas tartty.
