Almaty qalasynyń bas memlekettik sanitarlyq dárigeri Jandarbek Bekshin brifing barysynda jýrnalisterdiń «toiǵa barasyz ba?» degen suraǵyna jaýap berdi, dep habarlaidy QazAqparat.
Jandarbek Bekshin koronavirýs juqtyrýdan qoryqpaitynyn aitty. Óitkeni ol buryn aýyryp, ekpe alǵan. Bas dáriger soǵan qaramastan toiǵa barmaitynyn jetkizdi.
«Eger kópshilik jinalatyn is-sharalar týraly aitatyn bolsaq, virýs juqtyryp jazylǵanyma, vaktsina alǵanyma qaramastan onda barmaýǵa shaqyramyn. Óitkeni tasymaldaýshy bolýym múmkin. Iaǵni aýyrmasam da, ony basqalarǵa tasymaldaýym múmkin. Mysaly, otbasyma. Sondyqtan búginde toilarǵa barýdan bas tartamyn», - dep jaýap berdi ol.
BAQ ókilderi Jandarbek Bekshinnen demalys kúnderin qalai ótkizetini týraly surady. «Cenbi kúni men jumystamyn, jeksenbi kúni taza aýada serýendeimin. Senbi-jeksenbi kúnderi bir saǵat ústel tennisin oinaimyn», - dedi Almatynyń bas memlekettik sanitar dárigeri.
