الماتى قالاسىنىڭ باس مەملەكەتتٸك سانيتارلىق دەرٸگەرٸ جانداربەك بەكشين بريفينگ بارىسىندا جۋرناليستەردٸڭ «تويعا باراسىز با?» دەگەن سۇراعىنا جاۋاپ بەردٸ, دەپ حابارلايدى قازاقپارات.
جانداربەك بەكشين كوروناۆيرۋس جۇقتىرۋدان قورىقپايتىنىن ايتتى. ٶيتكەنٸ ول بۇرىن اۋىرىپ, ەكپە العان. باس دەرٸگەر سوعان قاراماستان تويعا بارمايتىنىن جەتكٸزدٸ.
«ەگەر كٶپشٸلٸك جينالاتىن ٸس-شارالار تۋرالى ايتاتىن بولساق, ۆيرۋس جۇقتىرىپ جازىلعانىما, ۆاكتسينا العانىما قاراماستان وندا بارماۋعا شاقىرامىن. ٶيتكەنٸ تاسىمالداۋشى بولۋىم مٷمكٸن. ياعني اۋىرماسام دا, ونى باسقالارعا تاسىمالداۋىم مٷمكٸن. مىسالى, وتباسىما. سوندىقتان بٷگٸندە تويلارعا بارۋدان باس تارتامىن», - دەپ جاۋاپ بەردٸ ول.
باق ٶكٸلدەرٸ جانداربەك بەكشيننەن دەمالىس كٷندەرٸن قالاي ٶتكٸزەتٸنٸ تۋرالى سۇرادى. «Cەنبٸ كٷنٸ مەن جۇمىستامىن, جەكسەنبٸ كٷنٸ تازا اۋادا سەرۋەندەيمٸن. سەنبٸ-جەكسەنبٸ كٷندەرٸ بٸر ساعات ٷستەل تەننيسٸن وينايمىن», - دەدٸ الماتىنىڭ باس مەملەكەتتٸك سانيتار دەرٸگەرٸ.
