Almaty qalasynyń bas memlekettik sanitariia dárigeri Jandarbek Bekshin men Qoǵamdyq densaýlyq saqtaý basqarmasynyń basshysy Kamaljan Nadyrov maýsymdyq tumaýǵa qarsy vaktsina saldyrdy, dep habarlaidy "Ult aqparat".
Jandarbek Bekshinniń aitýynsha, jergilikti biýdjet qarajatyna qaýip tobyndaǵy adamdarǵa tegin vaktsina egý úshin Reseiden 130 myń doza «Grippol Pliýs» vaktsinasy satyp alyndy.
«Sondai-aq, KVI-diń tirkelýin eskere otyryp, qosymsha 300 myń doza satyp alýǵa ótinish berildi. 2019 jyly qala halqynyń 10,3 paiyzyna (200 747), onyń ishinde qaýipti topqa engen 100 myń adamǵa jergilikti biýdjet esebinen tegin vaktsina egildi. 93 633 adam jumys berýshilerdiń esebinen, 7114- aqyly túrde jekemenshik meditsinalyq ortalyqtardan vaktsina ektirgen. Ekpe saldyrǵandardyń arasynda immýnizatsiiadan keiin ózderin jaisyz seziný jaǵdailary tirkelmedi», – dedi Jandarbek Bekshin.
Óz kezeginde, qalalyq Qoǵamdyq densaýlyq saqtaý basqarmasynyń basshysy Kamaljan Nadyrov vaktsinanyń eshqandai qaýip týdyrmaitynyn atap ótti.
«Biylǵy jyly biz vaktsina saldyrýǵa jaýapkershilikpen kelip otyrmyz. Sebebi koronavirýs pandemiiasy kezinde aýrýlar qabattasyp ketýi múmkin. Osy jaǵdaidy eskere otyryp, almatylyqtardy áriptesterimniń vaktsina alýǵa shaqyrýyna bei-jai qaramai, sol arqyly pandemiia jáne maýsymdyq aýrýlar órshigen ýaqytta JRVI jáne tumaýmen aýyrýdy azaitýǵa shaqyramyn. Satyp alynǵan vaktsina burynnan beri jaqsy tanylǵan, halyq arasynda ol birinshi ret egilip jatqan joq. Vaktsinanyń eshqandai qaýpi joq», - dedi Kamaljan Nadyrov.
Qalanyń epidemiologiialyq qyzmetiniń málimeti boiynsha, JRVI men tumaý biylǵy jyly qarashanyń sońynan bastap 2021 jyldyń birinshi toqsanynda órshýdiń eń joǵary shegine jetedi. Aldaǵy epidemiologiialyq maýsymnyń eresheligi – onyń koronavirýs infektsiiasymen birge órshý yqtimaldyǵynda.
