Almaty qalasy prokýratýrasy jáne IIM Qylmystyq-atqarý júiesi komitetimen birlesip, advokat J.Balǵabaevanyń tergeý-qamaýyndaǵy Janbolat Mamaiǵa qater tóndirýi jáne qysym kórsetýi týraly BAQ-ta jariialanǵan shaǵymyna qatysty tergeý júrgizildi, dep habarlaidy "Ult aqparat" QR IIM Qylmystyq-atqarý júiesiniń baspasóz qyzmetine silteme jasap.
Janbolat Mamaidan jaýap alý barysynda ol aýyzsha jáne jazbasha túrde tergeý izoliatorynyń ákimshiligine jáne kamerada ustaýda otyrǵan ózge sottalǵandarǵa eshqandai narazylyǵy joq ekenin jetkizdi.
Tergeý izoliatoryndaǵy meditsina bóliminiń mamany da J.Mamaidyń denesine zaqym kelmegenin, dene jaraqatynyń joqtyǵyn anyqtady. Atalǵan tergeý-qamaýyndaǵy meditsinalyq saraptamadan ótýden bas tartqan.
Osylaisha J.Mamaidyń ómirine qaýip tóndi jáne oǵan qysym kórsetildi degen faktisi rastalǵan joq.
Atalǵan oqiǵanyń ainalasyndaǵy daý-damaidy ýshyqtarmaý úshin Mamai tergeý izoliatoryndaǵy jalpy kameraǵa aýystyryldy.
Sonymen qatar, keibir adamdar qaýesetter men joramaldardy negizge alyp, «J.Mamaidyń ómirine qaýip tóndi jáne oǵan qysym kórsetildi» degen jalǵan aqparatty shyǵaryp otyr.
Osyǵan bailanysty BAQ ókilderinen osyǵan uqsas aqparatty basýdan buryn nemese silteme jasamai turyp resmi túsindirme men rastaýdy alý úshin IIM QAJ komitetine júginýdi suraidy.
Sondai-aq Qazaqstan Respýblikasy Qylmystyq kodeksiniń 242-1-baby 3-tarmaǵyna sáikes jalǵan málimet taratý belgili bir laýazymdardy atqarý nemese belgili bir qyzmetpen ainalysý quqyǵynan úsh jylǵa deiingi merzimge aiyra otyryp, bes júz ailyq eseptik kórsetkishke deiingi mólsherde aiyppul salý túrindegi jazaǵa alyp keletinin eskertemiz.
