Memleket basshysy Qasym-Jomart Toqaev Qarjylyq monitoring agenttiginiń tóraǵasy Janat Elimanovty qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaevqa agenttiktiń biylǵy 7 aidaǵy qyzmeti jóninde esep berildi.
Prezidentke usynylǵan málimetterge sáikes 857 is tergelip, 88 milliard teńge kólemindegi zalal óteldi. Kóleńkeli ekonomikaǵa qarsy kúres aiasynda 33 uiymdasqan qylmystyq top ustaldy. Biýdjet qarajatyn jymqyrý boiynsha 132 is tirkelip, keltirilgen zalal 57 milliard teńgeden asqan. Onyń 53 milliardy qaitaryldy.
Úkimetpen birlesip qabyldanǵan sharalar arqasynda kóleńkeli ekonomikanyń deńgeii sońǵy 3 jylda 23 paiyzdan 19 paiyzǵa deiin tómendedi.
Qasym-Jomart Toqaevqa jeke menshikti qorǵaý jáne reiderlik faktilerge jol bermeý úshin qabyldanyp otyrǵan sharalar jóninde baiandaldy. Qazirgi ýaqytta 8 is tergelip jatyr. Atap aitqanda, Almatyda biznesti reiderlik basyp alýmen ainalysqan qylmystyq top quryqtaldy. Olar 18 milliard teńgeden astam zalal keltirgen.
Sonymen qatar agenttik tarapynan kommýnaldyq qyzmet salasynda tarifterdi negizsiz kóterý faktileri anyqtalyp, 20 monopolistke qatysty 34 qylmystyq is qozǵaldy. Tutynýshylarǵa tarifti azaitý túrinde 11,6 milliard teńge zalal óteldi.
Prezidentke janar-jaǵarmai materialdaryn zańsyz shyǵarýdyń aldyn alýǵa qatysty tapsyrmalarynyń oryndalý barysy týraly da aqparat berildi. Janat Elimanovtyń habarlaýynsha, bul salada 36 is qozǵaldy. Atap aitqanda, Pavlodar, Batys Qazaqstan jáne Túrkistan oblystarynda iri somadaǵy janar-jaǵarmaidy zańsyz shyǵarýǵa jol berilgen joq.
Qasym-Jomart Toqaevqa azyq-túlik baǵasyn qoldan qymbattatqan josyqsyz tasymaldaýshylarǵa qatysty tergeý bastalǵany týraly baiandaldy.
Memleket basshysyna qarjy piramidalarynyń qyzmetin erte kezeńde anyqtaý boiynsha júrgizilip otyrǵan jumys týraly aityldy. Zańǵa qaishy keletin kontentti qamtityn 3 myńnan astam sait buǵattaldy. 64 is qozǵalyp, 7,8 milliard teńge kóleminde aiyppul salyndy.
Kezdesý sońynda Prezident biznesti jáne el azamattarynyń múddesin qorǵaýǵa baǵyttalǵan birqatar tapsyrma berdi.
