Foto: inform.kz
Elimizde janarmai qymbattasa, azyq-túlik baǵasy óse me? Bul saýalǵa Premer-Ministrdiń orynbasary – Saýda jáne integratsiia ministri Serik Jumanǵarin jaýap berdi, dep habarlaidy QazAqparat.
«Baǵa ósimi taýardyń túrine qarai áser etedi. Jeńil taýar bolsa asa qymbattamaidy, iri ónimderge baǵa tiisinshe ósýi múmkin. Janar-jaǵarmai baǵasy ósken jaǵdaida, mysaly qantqa áseri - 5 paiyz, al kúnbaǵys maiy - 2,4 paiyzǵa ósedi degen boljam bar. Shamamen 15-17 teńgege qymbattaýy múmkin. Taǵy bir aita keterligi, taýar óndirýshi iri kásiporyndar qazir benzin, dizelmen jumys istemeidi. Olar gazǵa kóshken. Al gazdyń baǵasy ázir óspeidi», - dedi Serik Jumanǵarin Úkimet otyrysynan keiin BAQ ókilderiniń saýalyna jaýap bere turyp.
Onyń aitýynsha, janar-jaǵarmai baǵasynyń ósýi azyq-túlik qunynyń artýyna aitarlyqtai áser etpeidi.
«Biyl kúzgi egis jumystaryna 413 myń tonna dizel otyny bólindi. Ol arzandatylǵan baǵamen litri 204 teńge bolady. Bul baǵa ózgermeidi. Sondyqtan janar-jaǵarmai baǵasynyń ósýi azyq-túliktiń qymbattaýyna asa áser etpeidi. Qazir elimizde baǵa turaqty, osy oraida birden ósirýge negiz kórmei turmyn. Onyń ústine bizde azyq-túlik qory bar», - deidi ol.
