Munai ónimderin bólshek saýdada ótkizý máselesi, naqtyraq aitqanda janar-jaǵar mai baǵasy baqylaýda. Bul týraly brifing barysynda QR Energetika ministri Bolat Aqsholaqov málim etti, dep habarlaidy QazAqparat.
Ministrdiń aitýynsha, búginde AI-92 benzininiń ortasha quny – 181, AI-95 – 213, dizel otyny – 230 teńge.
«Biz otyn taratý júiesin jetildirýdi, baǵa belgileýmen ainalysatyn ónimsiz deldaldardy joiýdy usynamyz. Olar – munai óńdeýge de, ony tasymaldaýǵa da qatyspaityndar, sondai-aq burynǵydai munai bazalary, janar-jaǵar mai quiý stantsiialary joqtar», - dedi energetika ministri.
Sonymen qatar, ol 180 kúndik moratoriiden keiin baǵanyń kúrt ósýine jol bermeý úshin energetika ministrligi memlekettik kirister komitetimen birlesip, suiytylǵan munai gazynyń ishki naryqtaǵy ainalymyn baqylaýǵa alǵanyn atap ótti.
Bolat Aqsholaqov AI-92 jáne AI-93 benzin suryptarynyń baǵasy jappai qatty kóterilmeitinin, óitkeni ministrlikte bul másele zańnamaǵa túzetýler engizilgenge jáne deldaldardy alyp tastaǵanǵa deiin retteletindigin tilge tiek etti.
«AI-95, AI-96 jáne AI-98 premiým markaly benzinge keletin bolsaq, onyń baǵasy negizsiz óspeidi. Bul dizeldik otynǵa da qatysty. Bul kúzgi jinaý naýqany oidaǵydai ótýi úshin jasalyp otyr», - dedi ministr.
Sonymen qatar, energetika ministri munai ónimderin avtomobilmen eksporttaýǵa tyiym salý 6 aiǵa uzartylǵanyn eske saldy.
