8 aqpannan bastap Mańǵystaý oblysy ákiminiń birinshi orynbasary Abzal Meńdibaevtyń basshylyǵymen Jańaózen qalasynda halyqty jumyspen qamtý máselelerin sheshý úshin óńir basshysynyń tapsyrmasymen qurylǵan oblystyq komissiia jumys isteidi.
Komissiia músheleri qalanyń áleýmettik-ekonomikalyq damýyna baǵyttalǵan keshendi damý josparyn negizge ala otyryp, Mańǵystaý oblysyndaǵy shaǵyn jáne orta biznes sýbektileriniń áleýetin, eńbek naryǵyn jan-jaqty zerdeledi.
- Bul baǵyttaǵy jumystar jalǵasýda. Halyqqa óńirdiń barlyq turǵyndaryn munai-gaz salasyna jumysqa ornalastyrý múmkin emestigin túsiný qajet. Men arandatýshylyqqa boi aldyrmaýǵa jáne zańsyz áreketter jasamaýǵa shaqyramyn, - dedi Mańǵystaý oblysy ákiminiń birinshi orynbasary Abzal Meńdibaev.
Komissiia jumysynyń qorytyndysy boiynsha, biyl Jańaózen qalasynda 2570 adamdy jumysqa ornalastyrý josparlanýda. Onyń 1434 turaqty jumys orny, al 1136 ýaqytsha jumyspen qamtylatyn bolady.
Atap aitsaq:
- Qalalyq jumyspen qamtý ortalyǵynan 5 sanat boiynsha kezekte turǵan 682 adam munai-gaz salasyna jumysqa ornalasýdyń qoldanystaǵy algoritmi boiynsha jumysqa qabyldanatyn bolady. Komissiia jumysy bastalǵan sátten bastap, 682 adamnyń 150-i jumysqa ornalasýda.
- "Ózenmunaigaz" AQ servistik qyzmet kórsetý mekemelerinde halyqtyń áleýmettik osal toptaryna jatatyn, halyqtyq baqylaý toby men jumyspen qamtý jáne áleýmettik baǵdarlamalar bólimi janyndaǵy Jumys komissiiasynyń usynymdaryna sáikes qurylǵan 318 jumys ornyna tańdalǵan azamattardy jumysqa ornalastyrý kózdeledi. Onyń 300-i jumysqa ornalasý ústinde.
Keshendi damý jospary aiasynda qalalyq, kentishilik avtomobil joldaryn jóndeý, Teńge aýylynda dene shynyqtyrý-saýyqtyrý kesheniniń qurylysy, Teńge aýylyna deiin sý qubyryn tartý jáne t.b. jumystar isteletin bolady. Sondai-aq jalaqysy 150 myń teńgeden bastalatyn 155 jumyssyz azamatty jumysqa ornalastyrý josparlanýda. "Jumys jasaityn" jobasy aiasynda 400 jumys ornyn qurý josparlanýda.
Budan basqa jeke kásipkerler esebinen 390 jumys orny qurylady. Bul bos jumys oryndarynyń jalaqysy 150 myń teńgeden bastalady.
Qala turǵyndary úshin jańa jumys oryndaryn qurý boiynsha sharalar kezeń-kezeńmen iske asyrylatyn bolady.
