© AFP 2021 / TOBIAS SCHWARZ
Jańaózen qalasyndaǵy №2 jáne №6 mekteptiń qyzmetkerleri el prezidenti Qasym-Jomart Toqaevqa oqý oryndaryn jekeniń qolyna berýdi toqtatýdy talap etip, úndeý jariialady, dep habarlaidy Sputnik Qazaqstan.
"Mektebimiz jekeniń qolyna ótse, jalaqyny ózgertip, qyzmetkerlerdi qysqartýdy bastaidy. Ata-analarǵa da qiyndyq týdyrady: bári aqyly bolady. Biz Qazaqstan Respýblikasynyń Konstitýtsiiasyna sáikes jumys isteimiz, synyptarymyzdy ózimiz jańarttyq, jańa jabdyqtardy ózimiz satyp aldyq. Biz mekteptiń jeke qolǵa ótýine úzildi-kesildi qarsymyz", - deidi ustazdar.
Osyndai videoúndeýdi 30 qańtarda №2 mekteptiń muǵalimderi de jazdy.
Mańǵystaý oblysynyń bilim basqarmasy ustazdardyń alańdaýyna negiz joq ekenin málimdedi. Mektepter jekeshelendirilmeidi, senimgerlik basqarýǵa beriledi.
"Mektepter memleket menshiginde qalady", - dep habarlady vedomstvo.
Memlekettik-jeke seriktestik mehanizmi arqyly senimgerlik basqarýǵa berý kezinde jeke serikteske qoiylatyn negizgi talaptar:
- muǵalimderdiń biliktiligin arttyrý arqyly bilim sapasyn kóterý;
- kúrdeli jáne jeńil jóndeýdi qajet etetin ǵimarattardy qysqa merzimde jóndeý;
- bilim salasyndaǵy zamanaýi tehnologiialardy paidalana otyryp, qazirgi talaptarǵa sáikes keletin sapaly bilim berý úderisin uiymdastyrý.
