Jańaózende tabylǵan tastandy náresteniń jaǵdaiy turaqty aýyr, dep habarlaidy "Ult aqparat".
Jańaózen qalalyq kópsalaly aýrýhanasynyń direktory Jańabai Ońaibaevtyń aitýynsha, tekseris kezinde onyń miyna qan quiylǵany anyqtalǵan. Sondai-aq, dáriger balanyń basqa da jaraqattary baryn aitty.
«Tekserýden keiin balanyń miyna qan quiylǵany jáne bas súieginde basqa da jaraqat bary anyqtaldy. Náresteniń qalai jaraqat alǵanyn dóp basyp aitý qiyn. Óitkeni, anasynyń qashan jáne qalai bosanǵanyn bilmeimiz. Qazirgi ýaqytta jańa týǵan nárestege qajetti em-dom jasaldy. Zond arqyly tamaqtanady», – deidi Jańaózen kópsalaly aýrýhanasynyń direktory.
Dárigerler shaqalaqqa Baqyt Rahat esimin bergen. Balanyń tegi ózi tabylǵan shaǵynaýdannyń atymen sáikes keledi. Politseiler balanyń biologiialyq anasyn áli tappady.
Esterińizge sala keteiik, 13 qyrkúiekte Jańaózendegi «Rahat» aýdanyndaǵy kóshelerdiń birinen tastandy náreste tabyldy. Turǵyndar jylap jatqan balanyń daýysyn estip, 103-ke qońyraý shalady.
Jedel járdem brigadasy jańa týǵan náresteni Jańaózen qalalyq kópsalaly aýrýhanasyna jetkizgen.
Balanyń salmaǵy - 2 keli 740 gramm, boiy - 49 santimetr.
