Qazaqstanda jańa óńirlerdiń qurylýyna bailanysty jeke jáne zańdy tulǵalarǵa buryn berilgen qujattaryn qaita resimdeýdiń qajeti joq, dep habarlaidy QazAqparat.
QR Ádilet ministrligi Tirkeý qyzmeti jáne zań qyzmetterin uiymdastyrý departamentiniń atap ótýinshe, Memleket basshysy Qasym-Jomart Toqaevtyń Qazaqstan halqyna Joldaýy aiasynda Abai, Ulytaý jáne Jetisý oblystaryn qurý týraly sheshim qabyldandy. Qoldanystaǵy zańnamanyń erejelerine sáikes bul reformalar jyljymaityn múlikke jáne zańdy tulǵalarǵa quqyqtardy tirkeý salasynda buryn berilgen qujattardy qaita resimdeýdi talap etpeidi.
«Jyljymaityn múlikke quqyqtardy memlekettik tirkeý týraly» Zańnyń 6-babynyń 2-tarmaǵynda eldi mekender ataýynyń, kósheler ataýynyń, sondai-aq úiler men ózge de qurylystardyń rettik nómiriniń (mekenjaiynyń) ózgerýin, kadastrlyq nómirlerdiń ózgerýin tirkeý Qazaqstan Respýblikasynyń ákimshilik-aýmaqtyq qurylysyn reformalaýǵa bailanysty quqyq ielenýshige júktelmeidi jáne óteýsiz júzege asyrylady.
Osylaisha, jańa oblystardyń qurylýy, eldi mekenderdiń qaita atalýy menshik ielerin quqyq belgileitin (mysaly: satyp alý-satý, syiǵa tartý sharty, paidalanýǵa qabyldaý aktisi, ákimdiktiń qaýlysy jáne basqalary) jáne sáikestendirý qujattaryna (jer ýchaskesine akti, jyljymaityn múlik obektisine tehnikalyq pasport) osyndai ózgerister engizý úshin tirkeýshi organǵa júginýge mindettemeidi.
Eldi meken ataýynyń ózgerýi jáne jyljymaityn múlik obektisi mekenjaiynyń basqa da derektemeleri (kóshe ataýy, ǵimarattyń, úi-jaidyń rettik nómiri) «Mekenjai tirkelimi» aqparattyq júiesimen integratsiialyq ózara is-qimyl sheńberinde «Jyljymaityn múlik tirkelimi» Memlekettik derekqorynda avtomatty túrde jańartylady», - dep atap ótedi departamentten.
Vedomstvo málimetinshe, «Quqyqtyq aktiler týraly» zańnyń 43-babynyń 3-tarmaǵyna sáikes azamattarǵa jańa mindetter júkteitin nemese olardyń jaǵdaiyn nasharlatatyn normativtik quqyqtyq aktilerdiń keri kúshi bolmaidy. Osyǵan bailanysty zańdy tulǵalardyń oblystardyń, eldi mekenderdiń burynǵy ataýy kórsetilgen resmi qujattary óziniń zańdy kúshin joǵaltpaidy.
Jańa oblystardyń qurylýy quryltai qujattaryn (jarǵyny, satyp alý-satý sharttaryn jáne t.b.), sondai-aq mórdi qaita resimdeý jóninde ádilet organdaryn habardar etý jóninde zańdy tulǵalardyń ókilderine mindet júktemeidi.
Azamattyq hal aktilerin memlekettik tirkeý týraly kýálikter aktilik jazbalarmen dálme-dál sáikestendirilip jazylady. Jergilikti jerlerdiń ataýy sol kezde bolǵan ákimshilik-aýmaqtyq bóliniske sáikestendirilip kórsetiledi, al memlekettik tirkeý orny – osy jergilikti jerde qazirgi ákimshilik bólinis boiynsha qyzmet kórsetetin tirkeýshi organ kórsetiledi.
Qujattarda eldi mekenniń burynǵy ataýyn kórsetý olardyń jaramsyzdyǵyna ákep soqpaidy. Qujattardy aýystyrý olardyń jaramdylyq merzimi ótken jaǵdaida nemese olar joǵalǵan jaǵdaida júzege asyrylady.
