Elordada jeltoqsandaǵy merekege orai qalany bezendirý tártibi bekitildi. Soǵan sáikes Jańa jylǵa daiyndyq Táýelsizdik kúnin merekelegennen keiin bastalady. Bul týraly Astana ákimi Áset Isekeshev qalalyq ákimdikte ótken apparat jinalysynda málimdedi, dep habarlaidy elorda ákimdiginiń media ortalyǵy.
Memlekettik jáne Ulttyq merekeler - Qazaqstan Respýblikasynyń Tuńǵysh Prezidenti kúnin, Qazaqstan Respýblikasynyń Táýelsizdik kúnin jáne Jańa jyldy elordanyń aýmaǵynda merekeleý aiasynda qalany bezendirý týraly Astana ákimi Áset Isekeshevtiń tapsyrmasyn oryndaý maqsatynda jumysy júrgizilýde.
Al elimizdiń basty merekesi - Táýelsizdik kúnine arnalǵan bezendirý jumystary 12 jeltoqsanda bastalady. Ataýly mereke kezinde Astanany 1280 jalaý, 2 jalaýsha pannosy, 64 saiabaq elementi jáne jaryq aspanyń 1 jiyntyǵy sándeidi dep josparlanyp otyr. Sondai-aq, Otan qorǵaýshylar monýmentindegi sý burqaqtardyń ornyna jaryq diodty instaliatsiialar ornatylady. Jaryq fontany metall karkasynyń negizinde jasalady. Konstrýktsiianyń biiktigi 3,5 metrdi quraidy. Jaryqtandyrý aq jáne kók túste bolady.
Jańa jylǵa daiyndyq Táýelsizdik kúnin merekelegennen soń ǵana, iaǵni 18 jeltoqsanda bastalady. Ol maqsatta shaharda 25 jańa jyldyq shyrsha, 12 hokkei alańy, 15 muz aidyny, 10 muz tómpeshigi, 2 muz qalashyǵy («Astana EHPO-2017» Ulttyq kompaniasy» AQ aýmaǵynda jáne Astana qalalyq ákimdigi ǵimaraty aldyndaǵy alańda) boi kóteredi. Buǵan qosa 2 jaryq pannosy, 18 jaryq illiýminatsiiasy, 52 jaryq illiýminatsiialyq arkasy, 830 panel-kronshtein, 106 KSP, 5 kópir men kólik jolairyǵy ornatylatyn bolady. 3300 shaǵyn jáne orta biznes nysandarynyń qasbeti, 255 aǵash, 2 qala saiabaǵy men 1 gúlzar bezendiriledi.
Kásipkerlik jáne ónerkásip basqarmasynyń aqparatyna sáikes, ShOB kásipkerlikteri óz erkimen qalada elýden astam shyrshany ornatatyn bolady. Elordadaǵy «Kerýen», «Rahmet», «Han Shatyr», «Saryarqa» siiaqty oiyn-saýyq ortalyqtary shyrshalardy ornatyp, bezendirý sharalaryn bastap ketken.
Aita keteiik, sońǵy ýaqytta áleýmettik jelilerde qaladaǵy jekelegen nysandardyń Jańa jylǵa daiyndyǵy men Táýelsizdik kúnin eleýsiz qaldyrǵanyna qatysty birqatar pikirtalas týyndaǵan bolatyn. Osyǵan orai Astana ákimi óz oiyn bildirdi.
«Jańa jyldyq shyrshalardy Táýelsizdik kúnin atap ótken soń, 18 jeltoqsannan bastap ornatamyz dep josparlaǵan edik. Keibir jekelegen nysandar shyrsha ornatyp, ony bezendire bastady. Buǵan qatysty narazylyq bildirgender bar. Táýelsizdik kúni elimizdiń basty merekesi bolǵandyqtan, basymdylyq sol merekege beriledi. Shaǵyn jáne orta biznes nysandary qalanyń merekelik bezendirýin qatań ustanatyn bolsyn. Táýelsizdik kúninde saltanatty jáne merekelik sharalar ótedi. Onyń arasynda karate-kiokýshinkaidan Kazakhstan Open, ústel tennisinen «Seamaster 2017 ITTF World Tour GrandFinal» týrniri, «Kúi Qainary» VI kúi tartys, QR Táýelsizdik kúninen arnalǵan «Táýelsizdigim - teńdigim, Egemendigim - eldigim!» atty jas aqyndar aitysy, kitap kórmesi men qazaqstandyq estrada ókilderiniń qatysýymen dástúrli kontsertter ótedi», - dedi Astana ákimi Áset Isekeshev qalalyq ákimdikte ótken apparat jinalysynda.
Sonymen birge, elorda ákimi aýdan ákimderi men Kásipkerlik jáne ónerkásip basqarmasynyń basshysyna shaǵyn jáne orta biznes ókilderine qalany merekelik bezendirýge qatysty bekitilgen josparyn ustaný týralý túsindirme jumystaryn júrgizýge tapsyrma júktedi. Iaǵni, Jańa jylǵa daiyndyq Táýelsizdik kúni atap ótkennen soń ǵana bastalady.
