Prezident Qasym-Jomart Toqaev Parlament Senatynyń otyrysynda 2023 jyldyń el úshin ońai bolmaǵanyn atap ótti, - dep habarlaidy "Ult aqparat" Aqordanyń baspasóz qyzmetine silteme jasap.
«Barshańyzǵa málim, ótip bara jatqan jyl ońai bolǵan joq, óte kúrdeli boldy desek artyq emes. Elimizde bolǵan qasiretti oqiǵalar jóninde ózderińiz bilesizder. Biz bárimiz bir el, bir ult, bir halyq bolyp, Otanymyzdy birlesip saqtap qaldyq dep esh kúmánsiz aitýǵa bolady. Aldymyzda turǵan negizgi maqsat – elimizdegi turaqtylyqty, qaýipsizdikti saqtap qalý, Qazaqstannyń jarqyn bolashaqqa qarai qarqyndy damýyna jol ashyp berý. Árine, bul joldyń ońai bolmaityny anyq. Biraq dana halqymyz barlyq qiyndyqty, tosqaýyldar men kedergilerdi jeńip shyǵatynyna men kámil senemin.
Adamzat koronavirýs indetiniń saldaryn áli de tolyq eńsere almai otyr. Oǵan qosa, geosaiasi ahýal ýshyǵa tústi. Sonyń kesirinen halyqaralyq daǵdarys kúsheidi. Munyń bári álem ekonomikasyn tyǵyryqqa tiredi. Biz osy kúrdeli jaǵdaida ekonomikanyń quldyraýyna jol bergen joqpyz. Ótken 11 aidyń qorytyndysy boiynsha ekonomikamyz 3 paiyzǵa ósti. Negizgi kapitalǵa salynatyn investitsiia kólemi 6,5 paiyzǵa artty. Bul jaman kórsetkish emes. Biraq jaibaraqat otyrýǵa bolmaidy», - dedi Memleket basshysy jiynda.
Sondai-aq Toqaev Úkimettiń jumysyn synǵa aldy.
«Men jaqynda ótken Úkimet otyrysynda bul másele boiynsha naqty aittym. Elimiz úshin óte mańyzdy birqatar másele boiynsha Úkimet laiyqty belsendilik kórsetip otyrǵan joq, sheshimderin baiaý qabyldap jatyr. Úkimet osy olqylyqtardy túzetý úshin áreketterin qoldanýda, taiaý arada onyń jumysynyń tiimdiligi artady dep oilaimyn. Premer-ministrdiń usynysy boiynsha Jańa jyldyń basynda Úkimette birqatar kadrlyq ózgerister jasamaqshymyn. Jalpy, Úkimettiń aldynda turǵan maqsattar – óte aýqymdy jáne ózekti», - dedi Prezident.
