Nur-Sultan qalasynyń Tótenshe jaǵdailar departamenti jańajyldyq merekedegi qaýipsizdik sharalaryn eskertti, dep habarlaidy "Ult aqparat".
«Qalamyzda sanitarlyq-epidemiologiialyq shekteýlerge bailanysty, jańajyldyq merekelik is-sharalardy ótkizýden bas tartyldy. Úidegi qaýipsizdikke kelsek, shyrshalar myqty jáne qulamaityn negizge ornatylýy tiis jáne evakýatsiialyq joldarǵa bóget bolmaýy kerek. Shyrshalardyń butaqtary qabyrǵalar men tóbeler arasynda bir metr qashyqtyqty saqtaý kerek. Shyrshaǵa taǵylatyn elektr girliandalar elektr qondyrǵylaryn paidalaný qaǵidalaryna sáikes kelý tiis. Onda kerneýligi 12 volttan, al qýaty 25 vattan aspaityn shamdar qoldanylýy shart», - dedi Nur-Sultan qalasy TJD Memlekettik órt baqylaý basqarmasynyń bastyǵy Erkin Otarǵalymuly elorda ákimdiginde ótken brifingte.
Sonymen birge, spiker jańajyldyq otshashýlardy tek qana ruqsat berilgen, resmi qaýipsizdik talaptaryna sáikes keletin, taýary sertifikattalǵan jerden satyp alýdy usyndy.
«Otshashýdy jeldi kúni paidalanýǵa bolmaidy. Onyń nusqaýlyǵymen mindetti túrde tanysý kerek, kózge kórinetin qandai da bir aqaýy bar otshashýdy paidalanýǵa tyiym salý qajet. Bilteni qoljetimdi araqashyqtyqta tutatý jáne kem degende 20 metr qashyqtyq saqtaý kerek. Al otshashýdyń ǵimaratqa deiingi aralyǵy 50 metrden kem bolmaýy tiis. Otshashýdy shatyrlar men aǵashtardyń, elektr jelileriniń astynda jáne úi-jailardyń ishinde atýǵa tyiym salynady», - deidi E. Otarǵalymuly.
