Jańa Zelandiiada Kraistcherch qalasyndaǵy eki meshitke shabýyl jasaldy. Bilik qansha adamnyń qaza tapqanyn áli aitqan joq, biraq premer-ministr Djasinda Ardern "kóp adam qurban boldy" dedi. Ondaǵan adam jaralǵan.
Memlekettik telearnalardyń biri "toǵyz adamnyń qaza tapqanyn" habarlaǵanymen, basqa basylymdar "qurbandar budan kóp ekenin" aitty. Jergilikti Herald gazetiniń jazýynsha, 27 adam qaza tapqan.
Reuters agenttigi "ainalamdaǵy adamdardyń bári qansyrap jatty" degen kýáger sózin keltiredi.
Otago Daily Times basylymynyń habarlaýynsha, atys Kraistcherch meshitterinde tús qaita bolǵan.
Shabýyldy qansha adam jasaǵany da ázirge belgisiz, biraq úsh er adam men bir áiel kúdikti retinde ustaldy.
Premer-ministri Djasinda Ardern "Mundai jaǵdai buryn bolǵan emes. Bul – el tarihyndaǵy eń qaiǵyly kúnderdiń biri" dep málimdedi.
Shabýyl qala ortasyndaǵy Ál-Nur meshiti men Linvýd qalashyǵyndaǵy meshitke jasalǵan. Kýágerlerdiń aitýynsha, áskeri kiimdegi avtomat ustaǵan azamat Ál-Nur meshitinde júrgen azamattarǵa oq atqan.
Biliktiń habarlaýynsha, meshitte bul ýaqytta júzdegen adam bolǵan.
Politsiia komissary Maik Býsh 15 naýryzda tańda "shabýyl jasaǵandarǵa qarsy operatsiia áli jalǵasyp jatqandyqtan eldegi meshitterdiń eshbirine barmai, úide otyryńyzdar" degen. Ol shabýyl jasalǵan mańda qoldan jasalǵan birneshe jarylǵysh zat tabylǵanyn aitty.
