Jańa Zelandiia soty eki meshitte 51 adamdy atyp óltirgen Brenton Tarrantty ómir boiy bas bostandyǵynan aiyrý jazasyna kesti. Ol el tarihynda osyndai úkim shyǵarylǵan alǵashqy adam boldy.
Avstriianyń 29 jastaǵy azamaty Brenton Tarrant 51 adamdy óltirip, taǵy 40 adamdy óltirmek bolǵany jáne lańkestik áreket jasaǵany úshin aiypty dep tanyldy, dep habarlaidy VVS agenttigi.
Sýdia onyń áreketterin «aiýandyq» dep atady.
Byltyr naýryz aiynda tikelei efir arqyly kórsetilgen meshittegi shabýyl búkil álemdi dúrliktirdi.
Tarrantqa qatysty sot úkimi Jańa Zelandiia tarihynda lańkestikke qatysty alǵashqy aiyptaý úkimi bolǵan. Eldiń ádil sot júiesinde ólim jazasy qoldanylmaidy. Bul qylmystan keiin Jańa Zelandiiada qarý týraly qatań zańdar shyǵaryldy.
Tarrant sot úkimin shyǵarýǵa qatysýdan bas tartty.
Sot úkimin tyńdaý dúisenbi kúni bastaldy, alǵashqy úsh kún jábirlenýshilerdi tyńdaýǵa arnalǵan.
Buǵan deiin habarlanǵandai, kúdikti er adam ótken jyldyń naýryz aiynda eki meshitke shabýyl jasaǵan.
Ol áýeli Ál-Nur meshitinde oq jaýdyra bastady. 30 cekýnd ótken soń, kóligine qaityp oralǵan ol basqa qarý alyp, meshittiń ishindegi adamdarǵa qaita oq jaýdyrǵan. Bul shabýyl Facebook áleýmettik jelisindegi tikelei efir arqyly kórsetilgen.
Odan keiin Tarrant Linvýd Islam ortalyǵyna baryp, onda kóshede júrgen eki adamǵa oq atyp, odan keiin terezelerge oq jaýdyrdy.
Qamaýǵa alynǵan Tarrant politsiiaǵa onyń jospary áýeli shabýyl jasap, odan keiin meshitterdi órtep jiberý bolǵanyn aitty.
Qylmyskerdiń taǵy bir meshitke shabýyl jasamaq bolǵany, biraq jolda politsiia qyzmetkerleriniń qolyna túskeni habarlanyp otyr.
