Foto: Orda.kz
Qytaidan kólik ákelgen bir top qazaqstandyq ony zańdastyra almai júrgenin aityp shaǵymdandy, dep habarlaidy Informbiýro arnasy.
Olardy syrttan kirgen kólikti elektrondy qujattaýǵa mindetteý tártibi tyǵyryqqa tiregen. "Jańa zańda shikilik bar" degen kólik ieleri júieniń durys istemeitinine shaǵymyn bildirdi. Aitýlarynsha, sonyń kesirinen ýtili men salyǵy tólenip qoiǵan temir tulparlar keden qoimasynda qalyp qoiǵan.
Kólik ieleriniń aitýynsha, tirkeý úshin qajet bolǵan anyqtamany beretin memleket bekitken zerthanalardyń 90 paiyzy jeke tulǵalarǵa qyzmet kórsetpeidi.
"Jeke tulǵalarǵa arnalǵan 2-3 zerthana ǵana bar. Bireýi Qyzylordada, bireýi Almatyda, úshinshisi Astanada. Solarǵa Kólik quralynyń qaýipsizdik sertifikaty, kýálik, mashinanyń sýretin, vin-kodtaryn beremiz de tirkeýge ótinish joldaimyz. Zań júzinde 24 saǵatta shyǵatyn qaǵaz. Biz osy kúnge deiin 16 kún, eń uzaǵy 21 kún kúttik. Shyqpaidy. Qazir múldem shyqpaidy!", – deidi kólik iesi Toibazar Amantaev.
Elektrondy qujatqa qoly jetpegenderdiń keibiriniń kóligi qoimada jatqanyna 1 aidan astam ýaqyt ótken.
Mashinanyń ol jaqta turǵany úshin de júrgizýshiler aqsha tóleimiz deidi. Avto brokerlerdiń aitýynsha, qazirgi ýaqytta kedendik tazalaýǵa qajet qaýipsizdik sertifikatyn alý da qiyndaǵan. Jańa tártip paida bolǵaly kóliktiń standartqa sáikestigin tekseretin kóp zerthana jabylǵan kórinedi.
"Buryn Almatynyń ózinde 50-den astam zerthana bolǵan. Jańa tártip kúshine engeli jartysynan kóbi jabylyp tyndy. Elektrondy qujattaý bylai tursyn, qaǵaz túrinde beriletin sertifikatty alý múmkin emes. Sonyń kesirinen 10 myńnan astam kólik ne ary emes, ne beri emes ortada qaldy", – deidi avto brokerlik kompaniia ókili Daniiar Kúzenbaev.
Aita keteiik, kólikti tirkeý tártibine jańashyldyq ákelgen Ónerkásip jáne qurylys ministrligi. Syrttan kirgen transporttardy elektrondy qujattandyrýǵa quqyǵy bar zerthanalar tizimin de solar bekitken. Júieniń onlain jumysyn Ulttyq aqparattyq tehnologiialar aktsionerlik qoǵamy júrgizedi. Biraq olar azamattardyń máselesin Ónerkásip ministrliginiń ózi retteýi tiis dep otyr. Al ministrlikten ázirge jaýap joq. Qazaqstandyq bola almai jatqan shetelden kirgen kólikter qoimada áli qansha ýaqyt qymtyrylyp turatyny belgisiz.
