Ónerkásip salalaryn qoldaýdan óńdeýshi ónerkásiptiń tiimdi kásiporyndaryn yntalandyrýǵa kóshý júzege asyrylady. Bul týraly Májiliste «Ónerkásiptik saiasat týraly» zań jobasyn tanystyrý kezinde QR Indýstriia jáne infraqurylymdyq damý vitse-ministri Amaniiaz Erjanov málim etti, dep habarlaidy QazAqparat.
«Institýtsionaldyq qamtamasyz etý aiasynda qujattyń 2-bóliminde Ónerkásipti damytý qory men «Ónerkásip» aqparattyq júiesin qurý jáne onyń qyzmetin júzege asyrý máseleleri rettelgen. Ónerkásipti damytý qory ónerkásiptik-innovatsiialyq qyzmetti memlekettik yntalandyrý is-sharalaryn usyný jónindegi operator bolady. Qazaqstan Respýblikasy ónerkásibiniń aqparattyq júiesi ónerkásip salalarynyń jai-kúii, olardyń damý boljamy jáne memlekettik yntalandyrý is-sharalary týraly aqparatty qamtityn aqparattyq júie qyzmetin atqarady. Qazaqstan Respýblikasynyń Ulttyq kásipkerler palatasy ónerkásiptiń aqparattyq júiesiniń menshik iesi jáne operatory bolady», - dedi vitse-ministr.
Onyń aitýynsha, zań jobasy aiasynda ónerkásip salalaryn qoldaýdan óńdeýshi ónerkásiptiń tiimdi kásiporyndaryn yntalandyrýǵa kóshý júzege asyrylady. Munda ishki naryqty sapaly ónimmen qamtamasyz etýge jáne eksportqa shyǵýǵa basa nazar aýdarylady.
«Zań jobasynda Indýstriia jáne infraqurylymdyq damý ministrligine qosylǵan quny joǵary jáne ónimdik kúrdeliligi bar orta ári joǵary qaita bólinistegi basym taýarlar tizbesin qalyptastyrýǵa quzyret berý kózdeledi. Operatorlar óńdeýshi ónerkásip kásiporyndaryn memlekettik yntalandyrý sharalaryn kórsetý kezinde osy tizbeni basshylyqqa alady», - dedi Amaniiaz Erjanov.
Sondai-aq zań jobasynda:
- yntalandyrý sharalaryn kórsetýdiń teńgerimdi qaǵidatyn iske asyrý;
- básekege qabilettilikti arttyrý týraly kelisim jasasý arqyly yntalandyrý sharalarynyń quramdastyrylǵan paketin alý múmkindigi;
- jańa quraldardy engizý jáne qoldanystaǵylardy reinjiniringteý kózdelgen.
«Osy bólim aiasyndaǵy zań jobasynyń negizgi jańashyldyǵy - ónerkásiptik saiasatqa ikemdilik pen jedeldilik berýge saiady. Zań jobasynda Úkimetke Ulttyq ekonomikanyń, onyń ishinde onyń ónerkásiptik-innovatsiialyq quramdas bóliginiń turaqtylyǵy men ornyqty damýyn qamtamasyz etý, ónerkásipti memlekettik yntalandyrýdyń jańa sharalaryn engizýdi, olardy joiýdy jáne qaita qaraýdy, sondai-aq olardy qoldaný tártibin kózdeitin qaýlylar qabyldaý quzyreti beriledi. Mundai sharalar VAK-tyń ónerkásiptik saiasat jónindegi usynymdary negizinde qabyldanady», - dedi vitse-ministr.
Budan buryn habarlanǵandai, búgin Májiliste «Ónerkásiptik saiasat týraly» zań jobasy men oǵan ilespe qujat tanystyryldy.
Ónerkásiptik saiasatty tiisti úilestirýdi qamtamasyz etý úshin negizgi zań jobasynda Ónerkásiptik saiasat jónindegi vedomstvoaralyq komissiia (VAK) qurylmaq.
