Foto: Viktor Fediýnin/Kazinform
Prezident Qasym-Jomart Toqaevtyń tóraǵalyǵymen Úkimettiń keńeitilgen otyrysy bastaldy.
Aqordanyń baspasóz qyzmeti 5 aqpanda taratqan resmi málimette keńeitilgen otyrys Qazaqstannyń 2023 jylǵy áleýmettik-ekonomikalyq damýy qorytyndylap, aldaǵy kezeńge arnalǵan negizgi mindetterdi aiqyndaityny aityldy.
Al Senat tóraǵasy Máýlen Áshimbaev otyrysta Úkimet jumysyna, ministrler qyzmetine baǵa beriletinin aitqan.
Basshysy aýysqan Úkimettiń baǵyty qanshalyqty ózgeretini osy jiynda birshama aiqyndala túsýi kerek. Ázirge qaita jasaqtalǵan ministrler kabinetinde tórt jańa esim bar.
Keshegi Májilistiń jalpy otyrysynda Memleket basshysy jańadan taǵaiyndalǵan Premer-Ministr Oljas Bektenovtiń komandasyna qandai jańa mindetter júkteletinin jalpylama aitqan edi.
Prezident Úkimettiń aldynda áýeli eldiń áleýmettik-ekonomikalyq saiasatyna jańa serpin berip, tarif saiasatyndaǵy kedergilerdi joiý, agrosektordy qaita jandandyrý áleýmettik salany basqarý men qarjylandyrýdyń tiimdi tásilderin ázirleý siiaqty mindetter turǵanyn atap ótti.
«Erteń Úkimettiń keńeitilgen jiyny ótedi. Sol kezde jańa quramnyń aldynda turǵan mańyzdy mindetterge tolyǵyraq toqtalamyn», - dedi Prezident.
Jalpy búgingi otyrystyń ótetini alǵash ret Memleket basshysynyń Egemen Qazaqstan gazetine bergen suhbatynda aitylǵan bolatyn.
