Turǵyn úige muqtajdardyń jańa bazasyna kezekke turý quqyǵy qandai da bir sanatqa jatatyndyǵyna qaramastan, sońǵy 10 jyl ishinde turǵyn úii joq barlyq azamattarǵa beriledi, dep habarlaidy QazAqparat.
Bul týraly QR Indýstriia jáne infraqurylymdyq damý vitse-ministri Erkebulan Daýylbaev QR Parlamenti Májilisinde aitty.
«Esepke qoiýdyń jańa tártibine sáikes turǵyn úige muqtajdardyń jańa bazasyna kezekke turý quqyǵy qandai da bir sanatqa jatatyndyǵyna qaramastan, sońǵy 10 jyl ishinde turǵyn úii joq barlyq azamattarǵa beriledi», - dedi vitse-ministr «Qazaqstan Respýblikasynyń keibir zańnamalyq áktilerine turǵy úi saiasatyn reformalaý máseleleri boiynsha ózgerister men tolyqtyrýlar engizý týraly» Zań jobasyn tanystyrý barysynda.
Sondai-aq, ol kezekte turǵandardy aǵymdaǵy bazaǵa esepke qoiý toqtatylatynyn eskertti. Al Otbasy banki mynadai qyzmetterdi jeke-jeke júzege asyratyn bolady:
1. Biryńǵai respýblikalyq elektrondyq bazany (aǵymdaǵy baza) júrgizý, monitoringileý jáne ózektendirý;
2. Turǵyn úimen qamtamasyz etý ortalyǵy bazasyn (kezekte turǵandardyń jańa bazasy) qalyptastyrý, júrgizý, monitoringileý, ózektendirý.
«Aǵymdaǵy kezekte turǵandar úshin jalǵa jáne kreditke beriletin turǵyn úidi bólý esepke qoiý kúni boiynsha júzege asyrylatyn bolady. Turǵyn úimen qamtamasyz etý ortalyǵynda kezekte turǵandar úshin turǵyn úidi bólý:
– jalǵa beriletin turǵyn úi úshin tólemdi sýbsidiialaý-esepke qoiý kúni boiynsha;
- kredittik turǵyn úi – baldyq júie boiynsha júrgiziletin bolady.
Bul rette, tabysy qajetti ball sanyn jinaqtaýǵa múmkindik bermeitin halyqtyń áleýmettik osal toptaryna jatatyn azamattardy qoldaý maqsatynda qosymsha baldardy engizý usynylady.
Sondai-aq, Otbasy bankiniń internet-resýrsynda ózektendirilgen tizimderdi jariialai otyryp, toqsanyna keminde 1 ret tizimdik kezektilikti túgendeý kózdeledi», - dedi Erkebulan Daýylbaev.
Bul jańashyldyqtar barlyq azamattar úshin memlekettik qoldaý sharalaryn ádil bólý qaǵidatyn tolyq kólemde qoldanýǵa múmkindik beredi.
