Azamattarymyz jańa Parlamentpen birge qarapaiym adamdardyń ómirinde jańa ózgerister bolatyndyǵyn kútedi. Mundai pikirdi Eýropalyq quqyq jáne adam quqyqtary institýtynyń direktory Marat Báshimov bildirdi, dep habarlaidy QazAqparat.
«Prezident Qasym-Jomart Toqaev bul sailaýlar demokratiiamyzdyń alǵa qarai damý qadamy bolýy tiistigin aitty. Árbir sailaý – bul azamattyq kemeldenýge arnalǵa baiypty emtihan. Májiliske qajetti 7 paiyzdyq tosqaýyldy eńsergen 3 partiia ótti. Qazaqstanda sailaýǵa kelýdiń aldyn ala qorytyndysy – 63,3 paiyz. Bul – barynsha joǵary kórsetkish. Máselen, Polshada sońǵy sailaýda 30 paiyzdan sál astam sailaýshy qatysqan. Azamattar joǵary azamattyq jaýapkershilik kórsetti, sailaý mádenieti joǵarylady. Naqty nátije sailaýdyń sońǵy qorytyndysy shyǵarylǵannan keiin bolady. Exit poll alǵashqy nátijeleri de bar», - dep jazdy Marat Báshimov Facebook-paraqshasynda.
Institýt direktorynyń atap ótýinshe, Exit poll álemdik áleýmettik tájiribede qoldanylatyn protsedýra sanalady. Onyń barysynda sailaý ýchaskesiniń shyǵa berisinde daýys bergen adamdar arasynda saýalnama alynady. «Qoǵamdyq pikir» zertteý institýtynyń exit poll nátijesinde respondentterdiń 5,75 paiyzy «Aýyl» halyqtyq-demokratiialyq patriottyq partiiasyna, 71,97 paiyzy «Nur Otan» partiiasyna, 3,07 paiyzy «ADAL» saiasi partiiasyna, 10,18 paiyzy Qazaqstannyń «Aq jol» demokratiialyq partiiasyna, 9,03 paiyzy «Qazaqstannyń Halyq partiiasyna» daýys bergen. Suhbat formatynda halyqaralyq standartty ádistemege sai ótkizilgen exit poll barysynda respondentterge «Parlamenttik sailaýda siz qai partiiaǵa daýys berdińiz?» degen bir ǵana suraq qoiylǵan.
«Sailaý ýchaskelerinde daýys berý sanitarlyq-epidemiologiialyq talaptardy saqtai otyryp ótkizildi. Sailaý protsesin uiymdastyrý laiyqty deńgeide boldy. Jastar kóp qatysty. Sailaý barysynda-aq Memleket basshysy Qasym-Jomart Toqaev halyqtyń azamattyq belsendiligi óte joǵary ekendigin atap ótti. Kandidattar kóp jáne olardyń barlyǵyna teńdei jaǵdai jasaldy. Sailaý joǵary deńgeide, zańnamaǵa sai boldy jáne aiaqtaldy. Qoǵam damýynyń jańa kezeńi bastalady. Azamattarymyz jańa Parlamentpen birge qoǵamdyq, áleýmettik ómirde, ózge de salalalarda, qarapaiym adamdardyń ómirinde jańa ózgerister bolady dep kútedi», - dedi ol.
