Aldaǵy oqý jylynan bastap dene shynyqtyrý jáne tehnologiia páni qyz jáne ul balalar úshin bólek ótkiziledi. Bul týraly Bilim jáne ǵylym ministrligi mektepke deiingi jáne orta bilim komitetiniń tóraǵasy Gúlmira Kárimova málim etti, dep habarlaidy QazAqparat.
«Aldaǵy oqý jylynda bilim jáne tárbie berý boiynsha oqý-ádistemelik nusqaýhat ázirlendi. Ol biylǵy oqý jylynyń sońyna deiin mektepterge jetkiziledi. Jańa oqý-ádistemelik nusqaýhat mektep jasyna deiingi balalardyń qaýipsizdigin qamtamasyz etý, tárbie jáne bilim berý berý protsesiniń sapasyn arttyrý maqsatynda qoiylǵan talaptarmen tolyqtyryldy. Erekshe qajettiligi bar balalarmen jumysty psihologiialyq-pedagogikalyq normalaryna sáikes uiymdastyrý, áleýmettik turǵydan osal topqa jatatyn otbasy balalaryn mamandandyrylǵan bilim uiymdaryna qabyldaýǵa arnaiy kvota engizý jumysy júrip jatyr», - dedi Gúlmira Kárimova Bilim jáne ǵylym ministrliginde ótken apparat jiynynda.
Sondai-aq, komitet basshysy bilim berý uiymdarynyń basshylaryn rotatsiialaý jumysy da jalǵasyn tabatynyn aitty. Búginde 200 bilim berý uiymynyń basshysy rotatsiialandy.
«Ózin-ózi taný pániniń oqý josparynan alynyp tastalýyna bailanysty ózin-ózi taný kýrsyn oqytý erekshelikteri týraly 19-bólimge ózgerister engizilip, mazmuny qysqartyldy. Kórkem eńbek pániniń 1-4 synyptarda eńbekke baýlý jáne beineleý óneri, 5-9 synyptardaǵy beineleý óneri men tehnologiia pániniń bólinýine bailanysty atalǵan pánderdi oqytýda ózgerister engizilip, tolyqtyryldy. Tehnologiia jáne dene shynyqtyrý pánderin ótkizýde synyptyń tolymdylyǵyna qaramastan uldar men qyzdar tobyna bólý týraly qaǵida engizildi», - deidi ol.
