Elimizdegi epidemiologiialyq jaǵdaiǵa bailanysty jańa oqý jyly dástúrli formatta bastalmaidy. Degenmen, ata-ananyń tańdaýyna qarai, 1-4 synyp oqýshylary úshin mektepte kezekshi synyptar bolady. Álihan Bókeihanov atyndaǵy №76 mektep litseii de jańa oqý jylyna daiyndalyp jatyr. Osy oraida mektep basshylyǵy sanitarlyq-epidemiologiialyq talaptardy oryndaý men kezekshi kabinetterdiń daiyndyǵy týraly baiandap berdi, dep habarlaidy QazAqparat.
«Bastaýysh synyptarǵa kezekshi toptarda ata-ananyń kelisimi boiynsha oqytýdy uiymdastyrý ruqsat etilgen. Qazirgi kezde mekteptegi bastaýysh synyptaǵy oqýshylardyń 453-i, iaǵni 60 paiyzǵa deiingisi kezekshi synyp toptarynda oqýǵa ótinish jazyp otyr. Mektep kezekshi synyptardy qabyldaýǵa da, qashyqtan oqytýǵa da tolyq daiyn dep aitýǵa bolady», - dedi mektep direktory Sapýra Tólekova.
Onyń sózine qaraǵanda, mektepte oqýshylar men eresekterdiń qaýipsizdigin qamtamasyz etetin barlyq sanitarlyq sharalar qarastyryldy. Osy oraida sanitaizerler, aniseptikter, túrli bakterialdy sabyndar, telovizorlar, dezinfektsiialyq tósenishter satyp alyndy.
«Maska men qolǵaptar bar. Kezekshi toptarda oqýshylar sany 15-ten aspaýy kerek. Sondyqtan barlyq kabinetterdegi oryndar tek 15 balaǵa laiyqtalyp daiyndaldy. Mekteptiń ishindegi áleýmettik qashyqtyqty balalar umytpai saqtaýy úshin arnaiy belgiler qoiyldy. Sonymen qatar, mektepke kirgizý men shyǵaryp alýda ártúrli esikter qarastyryldy, óitkeni úzdiksiz qabyldaý júredi. Oqýshylar 15 minýttyq aralyqpen qabyldanady, iaǵni tańerteń saǵat 8:00-de bir synyptyń 15 balasyn qabyldaý bastalsa, kelesi synypty 15 minýttan keiin qabyldaimyz. Sabaqtardyń arasyndaǵy úzilister de ár synypqa ártúrli belgilenedi. Osy oraida mektep dálizinde bir ýaqytta oqýshylar kóptep shoǵyrlanbaidy», - dedi mektep direktory.
Kezekshi synyptarǵa muǵalimderdi irikteýdiń tiisti talaptary eskerilgen. Bul turǵyda muǵalimniń kelisimi bolýy kerek. Odan keiin pedagogtyń jasy nazarǵa alynady, jasy úlken ári sozylmaly aýrý bar, dárigerlik esepte turǵan muǵalimder kezekshi synyptarǵa sabaq berýge tartylmaidy.
«Kezekshi synyptar bolǵan ýaqytta eresekter sanyn barynsha azaitamyz. Tek qana pedagogtar, tazalyqqa jaǵdai jasaityn jumyskerler, sondai-aq balalardyń qaýipsizdigine jaýapty muǵalimder ǵana bolady. Bir synypta bir muǵalim jumys isteýi kerek degen qaǵida saqtalady. Kezekshi synyptarda tek negizgi pánder oqytylady, qalǵan pánder onlain formatta qashyqtan júrgiziledi», - dedi S. Tólekova.
Tańerteń balalardy qabyldap alý mekteptiń syrtyndaǵy qorshaýdan iske asyrylady.
«Balada dene qyzýy anyqtalsa, birden ata-anasymen qaitarylady. Bala mekteptiń aldyndaǵy arnaiy araqashyqtyq belgileri arqyly kiredi. Sabaq barysynda balada dene qyzýy, jótel baiqalsa, onda arnaiy meditsinalyq kabinet janynan oqshaýlaý bólmesi jabdyqtalǵan. Sol oqshaýlaý bólmesinde bala jedel járdem nemese ata-anasy kelgenshe bolady», - dedi ol.
