QR Ulttyq ekonomika ministri Álibek Qýantyrov jańadan qurylatyn oblystardyń biýdjeti qalai qalyptasatynyn aitty, dep habarlaidy QazAqparat.
«Prezident birinshi jartyjyldyqtyń aiaǵyna deiin oryndaý úshin aiqyn tapyrma berdi. Qazir uiymdastyrý sharalary júrip jatyr. Áreketter algoritmi pysyqtaldy. Qaita qurýǵa túsetin oblystardyń ókilderi qazir Ulttyq ekonomika ministrliginde júr. Olardyń toptary bizdiń toptarmen birge jumys isteýde. Aýmaqtyq bólinis máselesin sheship jatyrmyz. Bul másele qosymsha talqylanyp, Prezidenttiń tiisti Jarlyǵy ázirlenedi. Negizgi uiymdastyrý jumystaryn jyldyń birinshi jartysyna deiin aiaqtaý josparlanyp otyr, Jalpy alǵanda, osy merzimde Jarlyqtardyń jobasy ázirlenip, Prezidenttiń sheshimi shyǵarylady», - dedi ministr Úkimet otyrysynan keiin BAQ ókilderine bergen suhbatynda.
Vedomstvo basshysynyń aitýynsha, qazir jańa oblystardy qurýǵa qajet qarajat eseptelip jatyr.
«Qajetti aqsha kólemi qazir eseptelip jatyr. Bizde oǵan qajetti rezerv bar. Qazirgi biýdjettiń kólemine syiǵyzýǵa tyrysamyz. Biraq qajet bolsa, qosymsha aqsha bólinedi. Óitkeni jańa ákimshilik-aýmaqtyq birlikter paida bolady. Ákimdikter, aýdandar qurylyp, shtattar sany bekitiledi. Onyń bárine rezervimiz bar. Ortalyqtyń, naqty aitqanda Memleket basshysynyń bastamasy bolǵandyqtan, qajet bolsa respýblikalyq biýdjetten qosymsha aqsha bólinedi», - dedi Álibek Qýantyrov.
