«Nur Otan» partiiasy oblystyq filialy tóraǵasynyń orynbasary, saiasi keńestiń múshesi Gúlnar Toilybaeva, saiasi jumys bóliminiń meńgerýshisi Láilá Saǵynǵaliqyzy, «Nur Otan» partiiasy Qarasai aýdandyq filialy tóraǵasynyń birinshi orynbasary Beibit Tólegen jáne aýdandyq máslihattyń depýtaty Atlana Isaeva bastaǵan top Qarasai aýdany, Jambyl aýyldyq okrýginiń «Jańaqurylys» yqshamaýdanynda salynyp jatqan mektep qurylysynyń barysymen tanysty.
Jambyl aýyldyq okrýginde 12 myń adam turady. Jyl saiyn turǵyndar sanynyń artýyna bailanysty balalardy mekteppen qamtamasyz etý ózekti máselege ainalýda. Qazirgi kúni Jambyl aýylyndaǵy 600 oryndy mektepte 1600 bala úsh aýysymda bilim alýda. Onyń ishinde 600 oqýshy ózge aýyldar men saiajailardan keledi. Sondyqtan «Nurly Jol» baǵdarlamasyna sáikes jańadan salynyp jatqan 600 oryndy mektep jalpy jurtshylyqtyń qýanyshyna ainalyp otyr, – dedi aýyl ákimi Bekzat Myrjiev qonaqtardy el jaiymen tanystyryp.
Tekserý tobynyń músheleri ishki-syrtqy árleý jumystary júrgizilip jatqan aýmaǵy atshaptyrym ásem ǵimarattyń ishin aralai júrip, ózderin tolǵandyrǵan saýaldarǵa jaýap aldy. Olar birinshi kezekte qurylystyń qarjymen qamtamasyz etilýin, onyń oryndy jumsalýyn, qurylys jumystarynyń josparǵa sáikes júrgizilýi men «Qazaqstandyq mazmun» baǵdarlamasyna orai otandyq materialdarmen jasalynyp, jabdyqtalýyn jan-jaqty surap bildi. Mektepti salyp jatqan «Qurylysshy TBS» kompaniiasynyń direktory Batyrhan Toqtaev kezdesken kedergilerge qaramastan ǵimarattyń belgilengen merzimde, iaǵni 25 tamyzda paidalanýǵa beriletinin jetkizdi.
– Qurylys jumystary sál keshiktirilip, ótken jyldyń qyrkúiek aiynda bastaldy. Biraq biz búginderi qaýyrt qimyldai otyryp, belgilengen kestege sáikes jumys atqarýdamyz. Qazirdiń ózinde munda jumystyń 70 paiyzy jasalyndy. Qurylysta 182 adam eki aýysymda jumys isteýde. Úlken eńbek ujymynyń árbir múshesi ózderine júktelgen mindetti sezine otyryp, qyzmetin sapaly atqaryp keledi. Endeshe, qansha qysyltaiań bolǵanymen mektepti jańa oqý jyly bastalǵanǵa deiin bitiremiz, – dedi Batyrhan Sydyquly.
Aitsa aitqandai, búginderi mektep qurylysyna bólingen 1 mlrd. 737 mln. teńgeniń 610 mln. teńgesin igerý ǵana qalǵan. Ǵimarattyń ishki-syrtqy árleý jumystary qarqyndy júrgizilýde. Sonymen qatar, 2,5 shaqyrymnan elektr jelisi, 1,5 shaqyrym jerden gaz qubyry tartylyp, qosýǵa daiyndalyp qoiylǵan. 280 metr tereńdikten uńǵyma arqyly taza sý shyǵarylyp, órtke qarsy sý saqtaityn rezervýar da paidalanýǵa daiyn tur.
Osy jáne ózge de jumystarmen tanysa kelip komissiia músheleri «Kedergisiz keleshek» baǵdarlamasyna sáikes múgedek jandardyń júrip-turýyna arnalǵan arnaiy qurylǵylardyń tolyq nazarǵa alynbaǵanyn eskertti. Atap aitqanda, ǵimaratqa kiretin pandýstar bar bolǵanymen olardyń tóbesindegi shatyry, múgedekter arbasy siiatyn dárethana oilastyrylmaǵan bolyp shyqty. Qurylys basshylary resmi ruqsat berilip, qarjy qarastyrylǵan jaǵdaida atalǵan máselelerdiń tez sheshimin tabatynyn aitty. Oryndalýy ońai osyndai olqylyqtar bolmasa, qurylysshylardyń jumysy qarqyndy ekenin kórgen qonaqtar riza kóńilmen sáttilik tilep attandy.
Qýat Qairanbaev
