Barlyq iri lastaýshy kásiporyndar jańa Ekologiialyq kodekstiń normalaryna sáikes óndiristik ekologiialyq monitoringiniń avtomattandyrylǵan júiesimen jaraqtandyrylatyn bolady. Bul týraly QR ekologiia, geologiia jáne tabiǵi resýrstar ministri Maǵzum Myrzaǵaliev Almaty turǵyndarymen kezdesý barysynda málim etti, dep habarlaidy Qazaqstan Respýblikasy Ekologiia, geologiia jáne tabiǵi resýrstar ministrliginiń baspasóz qyzmeti.
Onyń aitýynsha, Air quality index (aýa sapasynyń indeksi) kórsetiletin júieden alynǵan derekter tikelei ýákiletti organǵa kelip túsetin bolady.
«Lastanýdyń sebepteri men aýa sapasy týraly jedel aqparat alý úshin Ekologiialyq kodekske monitoringtiń avtomattandyrylǵan júiesi boiynsha norma engizilgen. Iaǵni, barlyq iri kásiporyndar tiisti tehnologiialarmen jabdyqtalýy kerek. Bul málimetter ashyq jáne qoljetimdi bolady», - dep atap ótti ministr.
«Talap» qoldanbaly zertteýler ortalyǵynyń direktory Rahym Oshaqbaev ta osy bastamany qoldaitynyn jetkizdi.
«Qazaqstanda Air quality index qoldaný qajet. Bul máselede maqsatty turaqty damý ádistemesin qoldanýǵa bolady jáne aýa sapasynyń indeksi bekitilgen standarttardan asatyn kúnder sanyn anyqtaýǵa bolady. Bul jerde halyqaralyq tájiribeni de zerdeleý mańyzdy. Aýa sapasynyń jai-kúii týraly aqparat halyqqa ǵylymi emes, túsinikti tilde berilýi tiis», - dep atap ótti sarapshy.
Esterińizge sala keteiik, Almatyda qala turǵyndaryna jańa Ekologiialyq kodekstiń normalaryn túsindirý boiynsha jumys kezdesýi ótti. Kezdesýge qoǵamdyq birlestik, ákimdik jáne BAQ ókilderi, ekobelsendiler, kásipkerler qatysty. Qaladaǵy aýa sapasy jáne ekologiianyń basqa da máseleleri alǵash ret ashyq formatta talqylandy.
