Qazaq tilin latyn grafikasyna kóshirý aiasynda 2019 jyly til mamandaryn oqytý jumystary atqarylady. Bul týraly QR Mádeniet jáne sport ministrligi Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵy bas direktorynyń mindetin atqarýshy direktory Erbol Tileshov málim etti, dep habarlaidy QazAqparat.
«Bizdiń ortalyqtyń negizgi baǵyty - ǵylymi saraptamalar júrgizý, sondai-aq jańa álipbidiń emle erejelerin halyqqa tanystyrý jáne qajetti oqý quraldarymen qamtamasyz etý. 2018 jyly jańa álipbidiń emle erejesi saraptaýdan ótti, shilde aiynan jeltoqsanǵa deiin júrgizildi. Atap aitqanda, 6 jeltoqsanda Úkimettiń janyndaǵy ulttyq komissiiada álipbidiń emle erejeleri maquldandy», - dedi E.Tileshov.
Onyń sózine qaraǵanda, biyl endi latyn grafikasyna kóshý baǵytynda muǵalimderdi daiarlaý sharalary iske asyrylady.
«2019 jyldaǵy negizgi josparǵa toqtalsaq, bekitilgen emle erejeni halyqqa úiretý baǵytyndaǵy sharalardy iske asyramyz. Osy baǵytta qajetti mamandardy daiarlaýǵa ekpin qoiamyz. Soǵan bailanysty Bilim jáne ǵylym ministrliginde biylǵa 9 038 adam, Mádeniet jáne sport ministrliginde 2 400 adam josparlanǵan. Bul turǵyda «Til-Qazyna» ortalyǵy 2 400 adamdy Astanada oqytady. Elimizdegi memlekettik tildi oqytý ortalyqtaryndaǵy ustazdar men ádiskerler qamtylady. Bizdiń ministrlik eresek adamdardy oqytýdy qolǵa alady. Al Bilim jáne ǵylym ministrligi mektep, kolledj, ýniversitetterdi qamtidy. Atap aitqanda, eń bastapqyda halyqty oqytatyn ustazdardyń quramyn daiyndaýymyz kerek», - dedi Erbol Tileshov.
Osy oraida ol 72 saǵattyq oqý baǵdarlamasy jasalǵanyn atap ótti.
«Naýryz aiynyń aiaǵyna qarai, biz onyń oqý quralyn daiyndaýdy aiaqtaimyz. Oqý quraly saitqa salynyp, kóp tirajben halyqqa taratylady. Sosyn barlyq óńirlerde seminarlar uiymdastyrylady. Munymen qosa, ortalyq atqarýshy organdar, buqaralyq aqparat quraldary ókilderi, kitaptardy latyn qarpinde shyǵaratyn baspa redaktorlary oqytylady. Bul baǵyttaǵy jumystar jalǵasa beredi, iaǵni biyl onlain sabaqtardy daiyndaimyz. Osy onlain sabaq halyqqa qoljetimdi bolady», - dedi ol.
