Qazaqstan Táýelsizdiginiń 30 jyldyǵyna arnalǵan nominaly 20 000 teńgelik mereitoilyq banknottyń shyǵyny basqa banknottarǵa jumsalǵan shyǵystarmen birdei. Bul týraly QR Ulttyq bankinen málim etti, dep habarlaidy QazAqparat.
«Bul banknotty shyǵarýǵa jumsalǵan shyǵyndar basqa banknottarǵa jumsalǵan shyǵystarmen salystyrmaly túrde birdei. Quny boiynsha aiyrmashylyqtar joq. Shyǵyndardyń negizgi úlesi materialdar men jumystardy satyp alýǵa, atap aitqanda, banknotqa beineler men qorǵanysh elementterin qoldanýǵa jumsaldy. Banknottyń dizainyn Ulttyq bank mamandary ázirledi. Banknottar men monetalardy shyǵarý boiynsha shyǵystar Ulttyq banktiń saitynda jyl saiyn jariialanatyn shoǵyrlandyrylǵan qarjylyq jyldyq esepte kórsetiledi», - delingen taratylǵan aqpartta.
Ulttyq bank málimetinshe, banknottar ekinshi deńgeidegi bankter (EDB) jáne «Qazposhta» AQ arqyly ainalysqa túsedi. Banknottardy aýmaqtyq filialdarǵa jetkizýge, EDB-nyń qolma-qol aqsha alýǵa jáne taǵy basqalarǵa arnalǵan ótinimderine bailanysty belgili bir rásimdik sátter bar. Aldyn ala derekter boiynsha, banknottar 2021 jylǵy jeltoqsannyń birinshi onkúndiginde ainalysqa shyǵady.
Mereitoilyq banknot jańartylǵan dizainǵa jáne innovatsiialyq qorǵanysh elementterine ie bolǵandyqtan, EDB-ǵa jáne biznes sýbektilerine banknottardy qabyldaý jáne berý úshin avtomatty qurylǵylardy beiimdeý jáne kúige keltirý úshin belgili bir ýaqyt (4 aidan 6 aiǵa deiin) qajet bolady.
