Qazaqstandyq sportshy Jámila Baqbergenova áielder kúresinen Aziia chempiony atandy, dep habarlaidy Olympic.kz.
Ulan-Bator bozkileminde ol 72 keli salmaq dárejesinde qarsylas shaq keltirmedi. "Dóńgelek ainalym" júiesi boiynsha ótken básekede otandasymyz qarsylastarynyń bárin jeńdi. Atap aitqanda, ol Davaanasan Enhamar (Mońǵoliia), Svetlana Oknazarova (Ózbekstan), Nikki Nikki (Úndistan) men Sýmire Niikýra (Japoniia) syndy myqty balýandardyń jaýyrynyn jerge tigizdi.
Nátijesinde áielder kúresinen Qazaqstan quramasynyń qorjynyna ekinshi altyndy saldy. Jarystyń alǵashqy kúninde onyń syńary Madina Baqbergenova 68 keli salmaqta top jarǵan bolatyn.
Aita keterligi, kúres túrlerinen Aziia chempionaty Mońǵoliia astanasy Ulan-Batorda ótip jatyr. Áielder kúresinen kezdesýler dóńgelek ainalym júiesi boiynsha ótýde.
Sportshylar ózderiniń salmaq dárejesinde barlyq balýandarmen ár ainalymda beldesip, jeńimpazdy anyqtaidy. Jámila atalǵan júie boiynsha barlyq qarsylasyn birdei jeńip, ýaqytynan buryn altynǵa qol jetkizdi. Bul - Jámila Baqbergenovanyń Aziia chempionatyndaǵy ekinshi altyny. Ol buǵan deiin 2020 jyly Niý-Delide ótken Aziia chempionatynda úzdik atanǵan.
