Búgin Jambyl oblysynda kópten kútken keremet poeziia merekesi máresine jetti. Atap aitqanda, Taraz qalasyndaǵy «Tórtkúl» mádeni kesheninde respýblikaǵa tanymal jas aqyndardyń qatysýymen «Jambyldyń jyr qaǵany-2018» poetikalyq dýeli ótti.
Aita ketý kerek, bul shara Qazaqstan Jazýshylar Odaǵynyń bastamasymen qolǵa alynǵan bolatyn. Alǵashqy poeziialyq kesh Almaty qalasynda ótip, artynsha aqyndar Qaraǵandy oblysynda bas qosqan-dy. Endi mine, úshinshi aimaq bolyp qasietti Áýlieata óńiri shaiyrlardyń shabytyn sharyqtatyp otyr. Jambyl jerindegi poetikalyq dýel «Qazfosfat» JShS bas direktory, Qazaqstannyń Eńbek Eri Muqash Eskendirovtyń jeke demeýshiligimen, oblys ákimdigi mádeniet, arhivter jáne qujattama, jastar saiasaty máseleleri basqarmalarynyń, oblystyq kásipodaqtar birlestiginiń qoldaýymen uiymdastyryldy.
-Jambyl jeri jas talanttarǵa kende emes. Poetikalyq dýeldi uiymdastyrýdaǵy basty maqsat-qazirgi qazaq poeziiasyndaǵy jastar shyǵarmashylyǵyna kópshiliktiń nazaryn aýdarý. Sol arqyly talantty zamandastarymyzdyń tanylýyna, shyǵarmashylyǵyn damytýǵa jol ashý kózdelýde. Odan bólek respýblikamyzdyń ár aimaǵynan kelgen jas aqyndardyń basyn qosyp, erkin pikir almasýdamyz,-deidi uiymdastyrý sharalarynyń basy-qasynda júrgen jas aqyn Nurbolat Satymqul.
Poetikalyq dýeldiń «Tórtkúl» mádeni kesheninde ótkizilýi de tegin emes. Uly Jibek jolynyń batys qaqpasy sanalǵan keshen qaz-qalpynda saqtalǵan. Shara barysynda elimizdiń túkpir-túkpirinen kelgen qonaqtar jaýhar jádigerlerdi tamashalap, Tarazdyń talaily tarihymen tereńirek tanysty. Sonymen qatar Jambyl jeriniń jeztańdai ánshileri óner kórsetip, ziialy qaýym ókilderi qazirgi qazaq ádebieti tóńireginde oi qozǵady.
Al, jyr saiysynda Ernar Ábdirazaq, Álimjan Shóńgerbai, Araily Jaqsylyq, Nazerke Ońǵar, Qurbanáli Shahabai, Nurbolat Joldasbek, Beksultan Qoshtaev, Móldir Raiymbekova, Shapaǵat Ábdiruly, Jumatai Kóksýbaiuly baq synap, órnekti óleńderin oqydy. Degenmen, qazylar alqasynyń ortaq sheshimimen jasyn-jyrlarymen jurtshylyqty tánti etken tarazdyq talant Nurbolat Joldasbek eshkimge des bermei, «Jambyldyń jyr qaǵany-2018» atandy. Jeńimpazǵa 400 myń teńge kólemindegi aqshalai syilyq saltanatty túrde tabys etildi. Sonymen qatar sharada ómirin óleńmen órnektep, sońyna ólmeituǵyn sóz qaldyrǵan qazaqtyń talantty aqyndary Artyǵali Ybyraev, Baýyrjan Úsenov, Serik Tomanov, Órnek Qulekeev atyndaǵy syilyqtardyń iegerleri anyqtaldy. Bul turǵyda darynymen daralanǵan Álimjan Shóńgerbai, Shapaǵat Ábdir, Ernar Ábdirazaq, Araily Jaqsylyqtyń mereii ústem bolyp, árqaisysyna 100 000 teńge kólemindegi aqshalai syilyqtar tapsyryldy.
Aitqandai, jas shaiyrlar tebirene jyr oqyǵan keshte kók júzin bult torlap, nóser jaýyn tógip saldy. Osylaisha talanttar men tabiǵat ortaq til tabysqandai áser qaldyrdy. Kelesi poetikalyq dýel Shyǵys Qazaqstan oblysynda ótetin bolady.
Baqyt ÁMEDIIa
